我係一個好悶既人,一個好典型既港產「乖學生」。
細個有人問我個夢想係咩,我會答:「讀好啲書,搵份好工」。當然,人大左就知道,呢個世界係唔會有人覺得自己果份工係「好工」。
做左幾年野,又有人問我有咩夢想。
我答唔出。
除左「唔駛做」,我諗唔到我有咩想做。反正每日都有一大堆我唔想做既事等住我架啦,仲到你諗想做咩?
結左婚,生左阿囡,每日過得有點不一樣;我仍然係一條悶棍,但至少,係一條油上左色彩既悶棍。我忽然間記得:其實我好鐘意寫野。不過咪住…寫啲咩呢?
睇住阿囡長大,然後開始同阿囡一齊撲學校。每一次搵學校既資料,我就係度諗:如果有人寫左間學校有乜特別就好了。事實上,我亦係好多唔同人既blog度了解左更多考幼稚園或者小學既資訊。
有一晚,我同老婆傾計,我隨口話:「不如寫個blog講搵學校啦,應該都有人睇既」。講完,自我興奮左十分鐘,第二朝還是那個十萬個不願意返工既我繼續返工。
過左幾日,我已經淡忘左呢件事。或者應該話…我已經淡忘左我想寫野既興趣。
估唔到老婆呢個時候問我:「你個blog呢?整左啦?」
「晤…可能都無乜人睇啦。都已經有人寫啦。Baby Kingdom大把料啦。」我確信我係搵藉口方面既能力係無出其右。
「既然你知道自己會鐘意又有passion做呢件事,點解唔試左先?諗咁多做咩呢,做左先講啦!」老婆霸氣回應。
就係咁,一年前既今日,我開左個blog同個fanpage。
我迫自己每星期要出兩個post,但原來呢個commitment係好大;試過寫到一、兩點都只係為左想keep住呢個一週兩post既commitment。
如果呢一刻有人再問我有咩夢想,我會話:「我希望終有一日,我會寫到一個動人既故事。」
我希望有一日我可以好自豪同阿囡講:其實呢…好悶既爸爸,原來都可以為一件喜歡既事投入自己既熱情。你都可以。
好多謝有睇過、like過或者笑過我寫既野既你。哪怕你只係笑左一小下,又或者,知道左一間學校多1%,對我黎講都係一份回報。
更加要多謝好多認識我又支持我做呢件事既朋友。係呀,講緊你、你同埋你呀。唔係你地既支持、鼓勵同埋幫助,我估我可能寫左一個月就收左工了。
最後多謝我老婆。唔係你一句「做左先啦你」同埋keep住做我第一個讀者,呢個blog唔會發生,更加唔會持續到一年。或者以後大家如果睇到一篇覺得對你有用既post,可以留言比個like我老婆。
係度希望大家繼續支持呢個blog同埋fanpage,我會繼續努力!
時間過得真快,原來我睇左你成年,今年輪到我玩呢個音樂椅啦,你的資料十分有用,多謝你們!
多謝你既支持!祝你今年小朋友入學順利!
i like your blog very much. my daughter will join the school this sep. thank you for your contribution. u help me a lot! keep it on. one day, your daughter will be proud of u.
Thx Judy!! Welcome to the Logos family!!!
Thank you sooo much for sharing , apart from school interviews info, I also like your toys stuffs.
Please share more ^^
Thx Yvonne! Yes I will be sharing more toy info in near future. Stay tuned!
黎緊到阿仔玩伊個遊戲,睇你個Blog真係好大鼓舞,資料好有用,其實我覺得你唔悶,幾風趣呀,字裡行間感覺你係一個好有智慧嘅爸爸,期待你嘅新post~如有更多升小故事就更好了,謝謝你好校爸!
哈哈多謝狗仔媽媽!好開心聽到個blog對你有用!我都好想寫多啲升小故事,但畢竟阿囡既故事只有一次,要靠其他家長提供又唔係咁容易。我會再試下邀請下其他家長分享!
Thank you for sharing , a harsh task for parents is coming
Thanks RC! Yes and the hardest part is there are just too many elements out of our control. Wish you all the best!