今日同老婆阿囡一齊去左參加真道一年級迎新日。自己一路都好鐘意真道，不過阿囡除左interview果兩次都無去過間學校，老婆之前亦無去到簡介會淨係聽過我匯報，所以今日終於可以一家一齊感受下間學校係點樣。
學生MC
迎新日2個鐘都係係禮堂度舉行。一開始3位NET出黎簡單介紹下自己，跟手帶出4個學生MC。成個show都係呢幾個學生MC由頭帶到尾，個個d英文都講得唔錯，而且感覺自然。
曹校長致辭
學生跟住介紹曹校長出黎致辭。校長除左講講學生係唔同既世界性比賽都能代表香港獲得佳積，佢仲分享左佢點樣勉勵應屆DSE考生。佢其中一句：你怕輸你就會輸 －果下聽到直頭以為張家輝黎左。校長話原來佢最愛阿仙奴，但點解佢地成日輸？因為佢地怕輸。校長勸勉學生，好多時做野唔好浄係掛住諗住個結果，害怕個結果。盡全力keep住做，成功係堅持下先會得到既結果。
課程介紹
學生MC跟住輪流介紹真道幾個獨有既課程同活動。揀左幾個我覺得幾得意既：
媒體科
宜家已經大概唔再係討論「小學生應否上網」既年代。Digital, social media已經係我地既生活一部分。學校就特別整左呢科媒體科，細個由技術開始學 (e.g. 當影張數碼相返去做個報導)到大個就加入多d道理既元素。
天輪教室
呢個其實有d似我地細個學既健教 – 不過佢個出發點係由一個家庭既角度去睇呢個社會。例如講理財，一般學校可能會教你「拿，唔好亂洗錢呀，因住爭人周身債呀你」；但呢個天輪課係會叫你向阿爸阿媽了解下一個家庭錢銀上點operate – 例如每個月你要用幾多錢買餸。唔係好明個真情支票點用…係咪要問叉燒炳？
電子附助教學
我同老婆不約而同覺得佢地用technology仲用得勁過我地公司。一份自拍video show and tell 已經係一份功課。
好interactive咁教你phonics:
鼓勵閱讀
一直有聞真道既閱讀風氣好好。圖書館老師介紹一年一度既圖書角色扮演大賽，小朋友當日會扮演佢地最鐘意既圖書角色，有少少好似Halloween咁。
學生表演
迎新當然唔少得學生表演。今次佢地主要有幾個表演項目：
- 跳繩
- 中國舞
- 非洲鼓
講真經歷左無數學校簡介會，d學生表演可以勁成點亦已見怪不怪。不過幾場表演d氣氛好好，我同老婆都特別鐘意跳繩 – 睇到每個表演者都好投入好開心咁做呢樣野。
即場互動遊戲
最後既高潮位係一位老師出黎介紹左一個用手機玩既互動遊戲叫做kahoot!。
在場既家長只要去kahoot.it個website然後用佢地個game ID join大會預先set左既game，手機就會同大會個screen上面既game sync。大會個screen會出7條有關真道既multiple choice問題，大家就用手機鬥快答。每一條答完佢就話你知邊個最快答完，然後就會出top 5。答晒7條最高分果5個有奬品。
點解無啦啦會show呢個game？原來平時d學生都會分組咁上堂比賽答問題，咁又真係好玩過鬥快舉手好多。
後記
我都幾相信大部分家長應該同我一樣，今日去完個迎新日後更鐘意真道。好期待9月開學！（好似講到自己有份返）
