[阿囡小二上學記] (二) 唱歌跳舞造句大法

由於太忙又太懶,第一篇寫阿囡開學,第二篇已經係考試……

不過無諗過我懶,有人比我更懶。

話說下星期就考試了,又到左同阿囡搏火既時間。自從阿囡升左小二後,自己既工作越來越忙,所以比起一年級既時候放手左好多 – 又或者不如話係放棄左好多。

阿囡上左小二後亦明顯心散左。我地希望佢可以多啲參加課外活動,所以基本上佢話想試乜我地都叫佢去試,結果一星期有兩日要係學校度活動,加埋出去學跳舞,成日都無乜時間比佢可以坐定定溫習。

聖誕節玩左成個假期無乜溫習,眼見下星期就考試,今日終於捉住阿囡同佢睇下啲中文科考試內容。

中文科今年既功課亦難左好多……一來覺得啲字深左,二來多左好多寫作元素。

今次考試內容要佢地識得作以下既句子:

  • 只要……,就……。
  • 如果……,就……。
  • ……一會兒……,一會兒……。
  • ……一邊…..,一邊……。
  • ……既……,又……。
  • ……除了……,還……。

由於驚阿囡唔識,所以我就叫佢試下作呢幾句比我睇下。諗住呢個任務應該都唔簡單,點知阿囡兩下就做完比我睇。

一睇,真係唔知好嬲定好笑……

  • 只要我做完功課,可以唱歌跳舞。
  • 如果我做完功課,可以唱歌跳舞。
  • 一會兒唱歌,一會兒跳舞。
  • 一邊唱歌,一邊跳舞。
  • 喜歡唱歌,喜歡跳舞。
  • 除了喜歡唱歌,喜歡跳舞。

你有無咁鐘意唱歌跳舞呀!?

不過諗返自己細個作文,其實咪又係咁。我地既眼界,大概只係著眼於將原稿紙上面果啲空格填晒佢就算,點會理佢前文後理丫。

歸根究底,阿囡個問題除左懶,另一個原因我覺得係佢識得太少中文字。「唱歌跳舞」四隻字就係佢個comfort zone,所以只要fit到,佢應該會不惜一切咁將呢四隻字萬能key入任何句子入面。

我諗點樣令佢鐘意睇多啲中文書,從中學多啲中文字,應該係未來一直會困擾我地既問題。早排一個朋友話佢個之前淨係睇英文書既女終於主動拎起本中文書睇,令我羨慕不已。

唔通……真係要好似秦始皇咁燒晒佢啲英文書佢先會拎本中文睇?

Leave a Reply

發佈留言必須填寫的電子郵件地址不會公開。 必填欄位標示為 *

想睇到最新內容?

歡迎讚好「好校爸」Facebook專頁!