Skip to content

[你問我答] 兩公婆點合作準備升小?

開左個blog一年多,間唔中都有啲家長會係度搵我傾下計。過程中坦白講幫唔到佢地啲咩,不過每次傾完都想將我地討論既問題同大家分享下,集思廣益。

早兩日同一位家長係FB傾左陣呢個問題:兩公婆點樣調整心態,一齊投入呢個升小既遊戲呢?

首先必需要了解到呢個叫升小既遊戲係有別於一般遊戲:佢係唔好玩既。所以本質上係好難投入。正如宜家你老細同你講:不如我地一齊玩一個叫做「返工」既遊戲丫?

我覺得考小學呢件事同返工其實有少少似。首要解決既問題係:你想要咩?你想返份咩工先:想辛苦但好pay? 定你想無咁辛苦但相對無咁好benefits? 係… 你實話:梗係要又唔辛苦又好pay啦。得得得無問題,不過好多人爭囉。

考小學都係咁,你想佢又要自由唔辛苦又要考DSE拎全部5**? 無話唔得既,但係又係好多人爭囉。當你發現現實無咁簡單同完美之時,你就要取捨。

所以當時同老婆一開始傾得最多,就係我地到底想要咩,同願意取捨啲咩 – 學費?成績?自由度?課外活動?大學入學率?要唔要補習?我覺得好幸運地係呢件事上面我同老婆都幾align,所以之後我地考小學既時間都無乜爭執。

咁點知每「份工」有咩benefits同壞處?雖然小學無LinkedIn,不過好多都有簡介會,而且你肯上網睇下一定大把資料 (例如有個叫好校爸既website呢…)。

當年research學校呢一part係我負責既。因為老婆細個唔係係香港讀書,所以佢將呢個重任交左俾我。雖則我好想同佢講:其實我細個讀書果陣係無直資架架架架架架,不過我都接受左呢個任務。因為話到明係合作:又好似返工一樣,唔係一定要將所有任務平分先work,最緊要係大家信任同align,maximize到個outcome。

例如每當屋企去親旅行,我基本上淨係帶個人同靈魂出現就已經ok,我老婆會安排晒所有野。因為佢安排旅行實在太強,而且佢又好enjoy做呢個事,基本上我出手都係嘥氣。當然,你睇完就會更加明白:死佬乜都唔駛你攪叫你搵下啲學校都托手肘……

所以我諗每個屋企都有佢地既合作模式,考小學都係咁。無話一定要邊個做啲乜野,不過我覺得最起碼個requirement兩個人一齊決定,而個結果應該要兩個人一齊去面對。

尤其係個結果好難唔關你事。就算你地既分工係其中一個唔駛理小朋友讀書,但你諗下若另一個因為呢件事同你小朋友日夜鬥法唔開心,你身處係屋企都好難獨善其身。淨係你另一半同小朋友輪流發你脾氣你都大鑊啦。正所謂:你的老公/老婆/仔/女情緒如何,你的命運也必如何。

唔知作為過來人既你,當年點同你既另一半合作呢場升小遊戲呢?而就黎要考小學既你,又有乜打算?歡迎大家留言發表下大家既睇法!

Be First to Comment

發表回覆

你的電郵地址並不會被公開。 必要欄位標記為 *