Skip to content

[弟弟小一升學記] (一) 到你喇…


我:「你想唔想佢黎呀?」

囡:「想呀!」

我:「咁你覺得…..佢機會大唔大呢?」

囡:「好難估…如果佢到時又唔聽話攪攪震就無啦。」

我:「咁又啱……唉……」


如果你有睇「阿囡小一上學記」既大結局,或者記得結尾時既呢一段對話。

邊個係「佢」?

之唔係阿囡個弟弟囉。

回想返家姐當年出世,樣樣野我同老婆都十級緊張 – 由佢飲奶到食固體、由報playgroup學野到返學全部都勁research過先做。淨係講報幼稚園都至少5 – 6間。

但當你有左第2個小朋友,緊張既程度就會急速下降。其實同你返工都幾似,你諗返你第一日出黎做野同宜家做左好多年變成old seafood,你緊張極有限啦。與其話係因為經驗架輕就熟,倒不如話係… 懶。

所以每當要處理弟弟既事,好多時就會用「同家姐一樣咪得囉」作為終極策略。例如買衫,好多時就會諗(尤其係老婆):呀,呢件買件中性啲既色,家姐著完俾弟弟著。

諗返自己細個其實都係咁。我仲記得自己細個著住成套粉紅色衫+褲+外套落街。點解?因為我都有個家姐……

所以去到幫弟弟報幼稚園果陣,基本上報左家姐讀果間幼稚園之後,都無乜點留意或者再research其他學校,因為知道收佢既機會好大,而且又懶再幫佢搵第二間,心諗:「咪又係差唔多……」。

奈何去到報小學就無咁簡單。家姐因為讀真道,弟弟如果要入埋去讀,一定要面試,唔似一般官津唔駛煩,仲要無乜特別優勢。我相信呢個位都係好多有多個一個小朋友既家長當初揀官津 v.s. 一條龍直私既人生交叉點。

正當家姐排除萬難考到入真道,又慢慢適應小一生活,我地亦慢慢淡忘左小一面試為何物;誰不知弟弟8月中一開學,幼稚園發出通告:「小一面試班報名」,將我同老婆重新捲入返呢個「遊戲」……

4 Comments

  1. Mel Mel

    我同你地情況一樣,不過哥哥係下年考小
    期待爸爸你地點安排細佬既入學呀

    • 好校爸 好校爸

      情況一樣係指有兩件要入小學?哥哥下年考小…咁即係同我個細仔同年? 今年K2?

      • Mel Mel

        係呀, 我大仔同你細仔一樣, 今年K2, 如果佢入直私我又係要玩多次呢個即將要面對既遊戲

        • 好校爸 好校爸

          咁大家一齊努力啦!加油!!

發表回覆

你的電郵地址並不會被公開。 必要欄位標記為 *