Skip to content

[升小故事] 地獄折返人間記 (一)

呢個係一個真人真事,一個阿媽(姑且稱佢為CC媽)「來回地獄又折返人間」既升小故事。

2018年6月2日,龍B小一大抽獎放榜。早一日既報紙話今年大抽獎入首三名志願的機率創近6年新高,令CC媽多多少少鬆左口氣。回想整整一年既考小學之路,CC媽心諗,好快就可以告一段落。

CC媽前前後後報考左八間直資私小,其中一間唔心儀既私小收左,最心儀既直資in到final round waiting,其他全部無晒消息。

諗住我有私小back up,雖然唔心儀,但都好過無既

CC媽媽話當時係抱住呢個想法去參加大抽奬。

自己認識CC媽個囡,心目中呢個小朋友雖然唔算係文靜坐定定果類,但相當主動活躍;覺得係面試下照計一個咁活潑既小朋友,應該不難被學校所喜愛。

一直覺得自己個女唔特別叻,又有啲怕醜內斂,但無想過成績出黎會咁差,一次又一次的失望。令我開始質疑自己,質疑個女…

經過失敗、失望以致自我質疑,CC媽帶住忐忑既心情,同阿囡係派位中心等結果。身邊既朋友陸續報喜:唔係第一就係第二志願,令原本有啲擔心既CC媽更加有信心可以係今日就將呢場升小既拉力賽結束。

然而…

到左CC媽去領取佢既結果,當佢睇到個結果既時候,幾乎唔敢相信自己雙眼:

一收到結果係有驚訝,有失望。派第廿幾志願??!!後來越諗越失望,我識人無乜理個仔又無乜準備,但佢都派到第一志願,而我咁俾心機,竟然派第廿幾!真係好嬲,好失望,嗰一刻平時自覺堅強嘅我居然想喊出黎!

正當心亂如麻之際,阿囡呢個時候問:「係咪好差呀?」

CC媽努力想擠出一副「唔係丫都ok呀」既表情,阿囡繼續問:「咁呢間係咪無乜功課架? 」

CC媽已無力再想出另一個答案,只係淡淡地講左句「係掛」。阿囡興奮做左一下「YES」既動作,令CC媽不知如何反應。

但CC媽知道不能就此氣餒,心裏面仍然相信阿囡能夠入讀更適合自己既學校。

我地睇黎運氣唔係太好,不過唔緊要。我地憑我地自己既努力同實力再試一下吧!

當時CC媽係咁樣同阿囡講。

呢句說話,同時都係CC媽為自己打氣既說話吧。因為跟住落黎既叩門程序,相信唔會比之前既直私面試來得簡單。

(待續)

photo: Sungmin Yook @ Flickr

呢D應該都啱你睇

地獄折返人間記 (四) 經過連番惡鬥,CC媽同阿囡終於黎到佢地揀既「111」小學藍田德田李兆強叩門面試。CC媽慶幸間學校好體...
地獄折返人間記 (二) 經過一番直私面試既折騰,然後再係大抽奬抽到無乜可能抽中既第廿幾志願。故事既第一部分對CC媽,相信有如...
地獄折返人間記 (三) CC媽第一間叩門既小學其實係藍田既聖公會李兆強小學。原以為一矢中的,奈何又係最後關頭臨門失控,CC媽...

Be First to Comment

發表回覆

你的電郵地址並不會被公開。 必要欄位標記為 *