Skip to content

[升小故事] 地獄折返人間記 (三)

CC媽第一間叩門既小學其實係藍田既聖公會李兆強小學。原以為一矢中的,奈何又係最後關頭臨門失控,CC媽既失望可想而知。

CC媽係學校行返出黎,話左CC幾句,畢竟忽然如此失控就算之後表現再好都無用。

兩個人抖擻精神,跟住出發去第二間要叩門既學校:油塘基法小學。油塘基法除左受區內家長歡迎,原來連宇宙最強都係呢度讀過書架

去到學校,CC媽同阿囡見到人山人海排晒長龍,成個操場每一個空間都企滿人,不由得一陣驚歎。可能真係要同宇宙最強一樣:一個打低十個先入到。

不過,油塘基法既第一輪叩門唔係考你打功夫,係考筆試。CC自己拎住文具入去考,考左一個鐘左右就出返黎,之後等學校通知會唔會有第二輪面試。

下午,CC媽同阿囡去到將軍澳區內一間一線津小:將軍澳天主教小學度叩門。之前聽話呢間學校會有筆試,但點知CC話去到只係參加左一個鐘左右既遊戲就攪掂第一輪面試,同樣係返去等第二輪既消息。CC話佢玩得好開心,CC媽都覺得有少少安慰,畢竟全日都係考試同面見,對小朋友黎講真係太辛苦了。

見CC狀態有少少回勇,CC媽同CC再出區外見埋第四間唔係抱太大興趣同期望既學校,漫長既第一個叩門日終於完結。經過左一日既叩門面試,CC媽亦發現左一件關於叩門迷思既事 – 到底係咪真係一定要111先有得面試?

啲學校話要填111的先有面試機會,其實都未必一定,例如我第一個叩門日四間都無填111,照樣有得去面試。我估可能都有睇埋portfolio!

首個叩門日即日賽後檢討,CC媽覺得阿囡「越戰越勇」,有信心應該有一間學校可以進入第二輪面試。CC媽亦希望阿囡可以keep住呢個狀態同心情到下一輪叩門,因為一個星期之後,CC媽同阿囡要去叩第五間學校,亦都係CC媽當日揀左做「111」既小學:藍田德田李兆強小學。

CC媽其實對呢間「111」學校既感覺有少少矛盾:佢鐘意間學校學業同課外活動都相當出色;但自己聽左簡介會之後又覺得自己同阿囡既性格未必真係適合讀呢間學校。

不過…暫時無offer在手(考到既私小真係太遠),「111」又豈可不叩?

終於到左「111」叩門日當日,天氣唔係好好。CC媽帶住少少矛盾既心情同阿囡黎到藍田德田李兆強學校門口。

(待續)

Photo credit: Kenaz @ Flickr

Be First to Comment

發表回覆

你的電郵地址並不會被公開。 必要欄位標記為 *