Skip to content

[升小故事] 地獄折返人間記 (二)

經過一番直私面試既折騰,然後再係大抽奬抽到無乜可能抽中既第廿幾志願。故事既第一部分對CC媽,相信有如地獄般絕望。

不過CC媽好快收拾心情,因為知道埋怨都無用,反而更應積極同阿囡準備叩門面試。

我哋做父母的只可以提供機會俾子女,如果我連表都懶得去交,就等於剝奪阿女嘅機會,我怕我之後會後悔。埋怨完,失望完,都要繼續,不能一蹶不振。

好彩CC媽早有準備,係大抽獎派彩之前,佢已經準備好portfolio、校長推薦信同埋自薦信,諗住萬一真係派得唔理想,都有充足準備應付叩門。

叩門通常都係派彩後一個星期內要交表,所以提前預備真係好重要!而且每間交表時間同埋準備資料都有唔同,最好先到每間學校網頁了解清楚。

當然,儘管可以係事前預備好晒叩門所需資料,要認識即將要叩門既學校、訂立一個好既叩門策略都要花唔少心思:

知道派彩結果後,一返屋企即刻研究每區值得去叩門既學校。自己先選左三個近自己屋企既區,然後每區選5間學校,共15間交表。淨係安排呢件事同老公都連續攪左三晚,晚晚搞到凌晨。仲記得有一日落大雨,送完仔女返學後繼續去交表但無帶遮,老公都淋到濕哂。

交晒表,之後陸續收到面試通知。呢個時候又有另一個考驗:因為叩門好多時都係同一段時期進行,好大機會撞時間,所以又要取捨邊間更值得去或更有把握入到。

終於到左第一個叩門日。

CC媽今日要一日走4場面試,第一間首先去隔離區一間一線津小。

第一場面試既形式已經相當緊張刺激:第一輪先由老師單獨面見小朋友考少少學術問題;若小朋友通過第一輪就即時同家長進行第二輪面試,否則就即刻打道回府。

阿囡(CC)不負所望,成功進入第二輪面試。CC媽興奮地同阿囡進入第二輪面試既班房。一坐底,老師就叫CC去一個箱度認7、8樣野,認完一分鐘後,返埋位講返係箱入面見到咩。講完之後,老師叫CC再返去個箱度揀一樣自己鐘意既野,然後講比老師聽點解。

CC結果揀左一盒顏色,話比老師聽佢鐘意畫畫。於是老師叫CC坐埋一邊畫畫,自己就同CC媽傾計。

傾計既內容不外乎對學校既了解:知唔知學校既理念,學校算係多功課但升中成績理想,問CC媽點睇等等。CC媽經歷直私面試既經驗,加上之前對學校既研究,小心翼翼地一一回答老師既提問。

CC媽自信成個面試到呢刻為止都相當順利,由阿囡以至自己既表現都恰如其分,開始感受到少少勝利既鼓動。

不過…往往就係呢啲時候出事。

老師問CC畫左咩畫,然後同CC講要收拾畫具。但CC竟然充耳不聞,自顧自地繼續畫畫。結果老師叫左佢5次,CC都完全唔肯停手。

老師結果話比佢畫埋幅畫,但CC係呢個時候進一步失控:佢忽然係自己幅畫度打左一個大交叉,然後再係同老師講bye bye既時候胡言亂語起黎。

CC媽離開既時候百感交集 – 原以為手到拿來,但最後一刻阿囡竟然徹底倒米。之後晏少少仲有3場面試,係呢度炳佢會影響之後既面試嗎?

(待續)

呢D應該都啱你睇

地獄折返人間記 (一) 呢個係一個真人真事,一個阿媽(姑且稱佢為CC媽)「來回地獄又折返人間」既升小故事。 2018年...
地獄折返人間記 (五) 由CC媽係大抽奬抽到廿幾志願到後來考到「111」 叩門學位重返人間,我都以為呢個升小故事會就咁大團圓...
地獄折返人間記 (四) 經過連番惡鬥,CC媽同阿囡終於黎到佢地揀既「111」小學藍田德田李兆強叩門面試。CC媽慶幸間學校好體...
地獄折返人間記 (三) CC媽第一間叩門既小學其實係藍田既聖公會李兆強小學。原以為一矢中的,奈何又係最後關頭臨門失控,CC媽...

2 Comments

  1. 砵媽 砵媽

    好好睇!勁想追!
    作為一個K1收到所有waiting的新手媽媽,真心覺得你的文章好正!

    • 好校爸 好校爸

      多謝你既支持!!
      會繼續努力寫,不過真係取材同整理需時,比少少時間我:)

發表回覆

你的電郵地址並不會被公開。 必要欄位標記為 *