[姐弟海外升學記] (九) 加拿大的第一學期總結

唔覺唔覺,兩姐弟黎到加拿大都讀咗一個學期了。

原來上回講完佢地開學之後,一直都無update到呢度。

廣告
Loading...

差不多又到年尾,喺度揀咗大家問得我最多既問題同大家回顧一下兩姐弟加拿大既第一個學期係點過:

讀寫聽講全部都係英文,佢地會跟得上嗎?

家姐黎到讀grade 3 (小三) online learning,老師已經唔會當你好似kindergarten咁係「新黎」,而且亦開始有功課,所以我同老婆都幾擔心佢既英文跟唔上。

好彩同老師傾左一次video call,老師話阿囡無乜問題。原來老師起初直頭唔知家姐係新移民;老師話如果將小朋友能力分成 1 – 4級,1係有問題,4係最好,家姐就介乎 3 – 4 之間。除咗寫作有少少grammer錯,overall佢做既野全部都算快靚正,鼓勵佢睇多啲書就ok了,唔駛擔心。

相對之下,弟弟返學既英文要求可能仲高少少:弟弟係返學校上堂既,雖則無功課,不過所有instructions都係面授,同學仔又係一齊面對面上堂,更加需要即時反應。

總體黎講,弟弟既英文跟得上呢度既academic,但未跟到同其他同學仔相處。當同學仔上堂學習寫ABC,弟弟其實已經寫到solar system裏面所有既星球名;但當其他同學仔好多互動一齊玩既時候 (e.g. work period或者小息),弟弟就仲係自己玩。

所以老師話佢宜家會著眼於教弟弟點樣主動去加入其他玩緊既同學,等佢學識點樣運用英語恰當地同其他人溝通。

上堂模式轉變,佢地會習慣嗎?

除咗語言,上堂模式對佢地黎講係另一個大轉變。

家姐上既係online learning,雖然喺香港果時佢都上咗大半年,不過呢邊既online learning唔似香港咁老師主導;好多時會係同學分小組討論做group project,又或者自己去做research。

我問家姐佢覺得上堂點,同其他人溝唔溝通到。家姐話有陣時如果人地講得好快,又或者講一啲同上堂內容無關既野佢就會有啲跟唔到,不過大致都ok。家姐又話佢幾鐘意宜家呢度既上堂模式,因為基本上無乜限制,又多時間俾佢講野,所以唔會覺得上堂悶。

弟弟雖然仲係上緊幼稚園,不過因為轉咗Montessori,所以第一個學期算係磨合階段。好彩Montessori每一日既日程都幾規律,除咗有某啲指定活動 (e.g. 做Yoga),又有一個鐘既work period俾你自由發揮,正好俾開始有啲心散既弟弟再度專注。

由於Montessori比傳統上堂既自由度更大,好似弟弟呢啲坐唔定既小朋友就容易更加唔集中。不過好彩老師又有佢既方法:老師拎咗張rocking chair俾佢,每當要佢坐喺度聽故事或者聽老師講野果陣就俾佢坐,等佢可以週身郁既同時可以停留喺一個地方面向老師。

所以雖然學習模式不同了,不過有好有耐性既老師幫佢地,兩個小朋友總算好快就習慣了。

廣告
Loading...

少咗功課測驗,佢地會學到野嗎?

作為亞洲人,一方面又成日驚佢地讀書辛苦,但心底裏始終又會有另一個擔心:佢咁得閒,學唔學到野㗎?

今次講咗弟弟先:如果只論學術,弟弟返學係真係無乜野學 – 因為呢度既幼稚園只讀一年,佢既同學仔其實全部都係第一年返學;好似之前咁講,當學校仲教緊ABC,由香港黎既弟弟已經「身經百戰」,起碼都已經有做功課寫字什至測驗既經驗了。

不過我地反而覺得弟弟更需要學既喺同人相處同自理能力,喺呢度返學正好填補到佢呢啲學習需要。因為呢度無姨姨,想解決任何需要,必需要自己去學習。加上始終係新環境,用呢段時間等弟弟catchup返點同同學用英文溝通已經夠多野學了。

至於家姐,雖然無咗測驗;不過我覺得家姐分分鐘學得仲多野過以前。呢度俾既功課既問題好open-ended:因為佢無指定答案,所以你學幾多野全憑你有幾多好奇心;家姐用多咗好多Google做research,除咗吸收咗好多新知識之外,更重要係同時學咗一樣好緊要既野:點樣問問題同點樣自己搵答案。

而比起喺香港佢小一果時我差唔多要push佢快手做功課,喺呢度佢真係完全自動波,而且亦樂在其中。

覺得阿囡總算無白費咗喺真道學既「自學」精神(又要多謝曹校長)。

講真少咗(什至無咗)功課,小朋友其實係唔會唔習慣既。不過我諗作為家長可能會唔習慣吧?

咁……有無唔好既地方呢?

我成日都覺得呢個世界既野都係give and take。好似移民呢件事本身,我夠知香港多好野食又有得去日本啦,不過當我決定移民黎加拿大享受呢度既寧靜同安穩,就必須學習捨棄住喺香港既方便。

讀書亦一樣,首先必要接受既係:你會覺得佢地學既野淺咗。我覺得呢度著重既唔係學既內容,而係學既過程;呢度返學唔係為咗學識一樣野,而係為咗學點樣去學識任何一樣野。如果你覺得小一學乘數表都太遲,你黎到會好失望;但如果你希望小朋友可以自己發掘知識,有自己時間同埋幻想空間,黎到呢度可能係天堂。

另外,因為少咗功課,又無測驗考試,所以家長對學生喺學校做咗啲乜其實知道相對少,亦未必知佢地學咗啲乜野。不過,或者呢個先係呢度既norm:因為宜家係佢返學,唔係你返學嘛。

最後一個問題,梗係…..中文啦。黎到一個英語主導既國家,想佢地既中文可以keep到的確好難,至少學校已經唔會教你中文。老婆好努力咁買咗啲書同佢兩個惡補,所以暫時兩個每日都有接觸中文既機會,不過真係嘔咗幾公升血囉……..

我暫時既希望:佢地唔好討厭中文就已經好好了。如果有一日佢地拎住本中文書愛不釋手地煲,我會好滿足。

我有幻想過佢地拎住本「射鵰英雄傳」係度睇得津津有味果個畫面。

希望到時唔係睇緊英譯版既shoot the eagle hero啦。

廣告
Loading...

Leave a Reply

想睇到最新內容?

歡迎讚好「好校爸」Facebook專頁!