[姐弟海外升學記] (八) 開學的抉擇

  •  
  •  
  •  
  •  
  •  

搬家處理家當搵學校面試報學校,為既就係呢一日。

兩姐弟要喺加拿大開學了。

廣告
Loading...

不過同香港一樣,今年加拿大既開學,都係不一樣既開學。

先講小學,因為Covid19既原因,Alberta教育局俾咗兩個開學選擇家長揀:1. 照常返學;2. 喺屋企online learning。呢兩個選擇唔係投票後揀最多人揀果個,而係兩者並行;而且揀咗之後無得轉,直到下年2月為止。

因為呢個選擇,老婆同好多本地既媽媽真係輾轉反側費煞思量。俾佢返,你又驚佢中Covid19;唔俾佢返,你又覺得佢日日喺屋企少咗同其他同學老師互動。特別係我地呢啲新移民,梗係希望小朋友盡早接觸新環境新朋友,但你又驚佢接觸埋新病毒。

然後老婆每日都好似跳掣一樣:果頭問佢佢話option 1,過一個鐘問佢就話option 2。佢就好似妙齡少女揀男仔咁:一個靚仔 v.s. 一個有錢,點揀呀?而且老婆諗野又諗得好遠,令佢更加難決定:如果揀靚仔佢第2日就甩頭髮、揀有錢佢第2日就破產咁點呢?

我其實比較傾向上online learning。大家都明白返學既好處,不過非常時期,非常手段嘛。尤其是睇到連加拿大總理都唔係好sure送唔送小朋友返學好,攪到我地更加唔敢送阿囡返學校。好彩老婆身邊都有不少朋友選擇online learning,令我地慢慢地由每日跳掣,變成最後決定咗online learning呢個選擇。

廣告
Loading...

老婆打返學校confirm阿囡online learning既安排果陣,順便問下老師佢果班有幾多人上online,結果都有4個。我同老婆心諗:咁都好過全班得佢一個既……

如果可以的話,其實弟弟係俾家姐更需要online learning果個。因為弟弟同佢啲同學都仲細,好難要佢地明白同實淺到社交距離。可惜Alberta教育局對幼稚園無online learning既安排,所以你既選擇只有返或者唔返。

弟弟返唔返學又俾家姐再多一重考慮 。因為喺呢度讀幼稚園只讀一年,跟住就入小學,想適應呢度既既校園生活其實最好由幼稚園開始。尤其係弟弟適應力俾家姐差好多,俾佢早日喺學校習慣返學既流程會好啲,如果唔係到小一先入學,可能到時佢都唔知人地喺度做緊乜。

所以老婆為咗弟弟可以喺新環境安全返學,同佢進行一系列「特訓」。首先,老婆寫咗幾句老師會成日講既英文,同埋一啲弟弟有機會要講既英文(e.g. 去廁所) 俾佢練習。好彩弟弟喺香港讀既幼稚園都慣咗外藉老師做班主任,希望佢唔會太唔習慣。老婆又要弟弟練習洗手、載口罩同埋除口罩,仲要教佢唔好成日痴埋人地度,希望佢保持衛生就唔會中招。

終於,到咗九月二日,弟弟要返學校上堂了……

(待續)

廣告
Loading...


  •  
  •  
  •  
  •  
  •  

Leave a Reply

想睇到最新內容?

歡迎讚好「好校爸」Facebook專頁!