[姐弟海外升學記] (六) 校長的一對一簡介會

  •  
  •  
  •  
  •  
  •  

同阿囡去完charter school面試,覺得算係任務完成了。無論結果如何,起碼都叫做盡力試咗。而且就算最後唔得,老婆話仲有public school呢個選擇。

喺香港如果想讀官津,我地要喺住址既校網入面選擇想讀既學校 (例如名校區九龍城41校網),然後按心水排先後次序填表大抽奬 (唔計自行階段啦)。喺加拿大讀公立學校就簡單好多,因為呢度唔係跟校網,而係用walkzone黎派位。

廣告
Loading...

Walkzone簡單啲講即係你間屋附近既community,每個walkzone都會有一間指定既學校 (designated school)。Designated school係必需要收住喺呢個walkzone既小朋友,除非佢爆左人數。

老婆話反正我地因為charter school既面試都要去加拿大,不如順便去designated school做埋入學申請。老婆於是打電話問學校點做入學申請,問下問下學校個秘書竟然話:校長話會親自帶我地參觀學校。

喺香港我都算係去過不少簡介會同開放日了。香港既學校簡介會次次都人山人海,想問校長問題都要排隊舉手。宜家校長竟然話要親自一對一帶我地去認識間學校,個感覺有少少似劉德華同你講:「唔駛黎演唱會啦,你上黎我度我自己唱隻歌你聽」一樣。

於是受寵若驚地,我地去咗我地區既designated school參觀。

學校距離我地住處其實行過去大約十五分鐘左右,不過參觀果日太凍,所以老婆決定揸車過去。我地好快就到咗目的地,第一眼見到間學校,我既感覺係:好似好細咁既……

我地一行4人去到校務處,秘書好快已經講得出阿囡個名。秘書小姐仲話:of course! 因為全校得阿囡係叫呢個名。個秘書記得哂全校學生嘅名令我十分佩服,因為我連阿囡同弟弟成班同學既名都講唔到二十個。

校長無幾耐就出黎迎接我地;校長係一位上左年紀、一頭金髮中等身型、戴金絲眼鏡既女士,散發住一派書卷氣。

校長先同我地傾左陣計,了解我地同小朋友既情況,然後好耐心咁俾左好多意見我地。對於完全唔明白加拿大學校系統既我黎講,可以話係上左一堂補習課。校長仲建議我地不妨去約其他學校參觀,了解多啲先決定。

傾完計,校長先帶我地去睇music room。一路行一路望,我覺得成個校舍好似我一眼都已經可以望完了。我同老婆互望一眼,大概大家都係同一個想法:「點解呢度咁細既」。

校長跟住帶我地去睇一班小一上堂。入到班房後既氣氛同香港截然不同:平時如果去觀課,大概就係老師既個人show – 老師一定出盡渾身解數講學,而且啲學生一定會當你係外星人咁望住你。

但當我地入去呢度既班房果陣,啲學生望左我地一眼之後,就個個若無其事繼續自己做自己野 。冇老師企係班房前面,有學生喺自己個位度寫野,有啲企有啲坐,有人畫緊野,有幾個坐埋一邊好似係度傾野,各式其式。感覺好似去咗公共圖書館咁,大家各有各做自己嘢。老師係坐喺自己角落頭張枱,又係做緊自己嘢。

廣告
Loading...

我地發現之後入去既班房都係差不多,基本上係唔會有個老師喺度全程講俾你知要做咩,堂堂都好似自修堂咁既感覺。

校長跟住話帶我地出去操場出面睇下。正當我地仲喺度搵緊頂帽同手套之際,校長連披件褸都唔駛就行咗出去了。一出到去,一陣新鮮又凍到陣既冷風吹埋黎,成個人醒唒。我同時發現:學校既indoor space可能唔算大,但計埋室外既地方就唔同了。

由操場望出去一直到好遠都係一片雪白;再向更遠處望有一棵棵大樹連接住灰白色既天空。呢個畫面好似特登提醒返我,點解「好地地」要移民。後來我先知道原來加拿大呢度既小學,一個遊樂場、幾個球場,再加一個大過足球場既草地算係基本野。

校長問阿囡鐘唔鐘意呢度,阿囡好甜但又好細聲咁答佢:「鐘意」。我心諗咪扮cool啦,睇住佢見到遠處個遊樂場雙眼發唒光。

校長話佢地好著重outdoor既活動,所以每個星期五佢地一定會出黎上堂 – 唔理幾多度。聽講…呢度凍起黎成零下二三十度……

我地係室外傾左一陣,校長帶我地返室內睇最後一個景點:圖書館。與其話係圖畫館,倒不如話係圖書閣:唔係話個圖書館細,而係佢無刻意間一個房間出黎做圖書館;喺走廊行行下就會見到一大堆書櫃同埋圖書喺你面前,好似係主動邀請你埋去睇佢地一樣。

校長仲話因為學校細而且學生少,每逢有大型活動,全校師生都會坐喺圖書館中間個空地度慶祝或表演 (校長指住中間有幾級樓梯,好似迷你版既香港演藝學院賽馬會演藝劇院)。 即刻幻想全校係呢度搞個好似「真道閲讀同樂日」既活動,小朋友扮演圖書角色係度行catwalk ,應該會好perfect。如果聖誕節全校一齊係度慶祝,一定好warm啫。

經過校長既介紹,漸漸開始鐘意呢間細得黎但又好warm既學校,之前覺得間學校太細既想法慢慢消失。尤其係當我地打去其他學校約參觀既時候,其他學校既回覆係:我地無啲咁既野㗎喎、開放日過咗啦喎;令我同老婆更明白呢位親自帶我地參觀既校長有幾咁熱心。

如果阿囡最終入唔到charter school,俾佢同弟弟一齊係呢度讀書,其實都幾好丫。

咁…如果阿囡考到呢?

咁咪係香港家長成日好興講既「happy problem」囉。

而我對待happy problem既策略係:到真係有先算啦。

(待續)

廣告
Loading...


  •  
  •  
  •  
  •  
  •  

Leave a Reply

想睇到最新內容?

歡迎讚好「好校爸」Facebook專頁!