[姐弟海外升學記] (十一) group presentation

家姐黎咗加拿大讀書之後,多咗好多做presentation既機會。家姐雖則好鐘意講野,不過性格都係偏鵪鶉,所以宜家多咗俾佢表達自己想法既機會其實對佢係好事。

家姐有個同學忽然撩佢一齊做一個關於animal既research,做完之後一齊present俾全班聽。家姐好開心:一來有個同學仔搵自己,二來家姐因為做過上次presentation後信心多咗,好想表現自己,於是躍躍欲試地應承咗佢呢個同學仔。

意想不到呢個決定令佢之後非常失落。


到咗佢要present既日子,睇得出家姐既興奮又緊張。點知落咗堂,家姐一面失望咁走埋黎我度。

我:點呀,頭先present成點?

囡:(失望樣)好差囉….

我:我知道你好用心咁準備喎,點解覺得差?

囡:因為我同學改唒我d slides,同埋佢無俾機會我講完d slides就跳走咗……

阿囡跟住一口氣講咗佢同同學合作既經過:同學仔搵佢一齊做project佢好開心,於是佢好俾心機坐咗成日去做d slides。過程中阿囡俾過唔同既意見佢同學,不過佢同學無理佢,否定哂佢所有提議。

例如阿囡提議不如喺個slide度用point form去介紹啲動物會清楚啲,但佢同學話佢鐘意一大段字寫上去多啲,結果阿囡寫果啲point form俾佢成段字replace咗。

阿囡覺得係個同學邀請佢既,所以佢決定聽個同學講,唔用point form照跟佢個做法去做。不過佢跟同學仔方法寫完之後,一食完個飯返黎又俾佢同學replace咗。

阿囡好嬲,同佢講唔好改佢啲野,諗住應該無事了。點知去到present果時,阿囡發現佢同學又改哂佢啲slide,所以阿囡準備好咗點講既野全部變哂,結果講到一舊舊。另外個同學改佢啲slide果時不停咁串錯字,令阿囡覺得好醜:攪到好似自己啲英文好差咁。

但阿囡最唔開心果下係個同學喺佢present果時,俾咗一個好唔耐煩既樣俾佢;阿囡未講完張slide佢個同學就已經飛去下一張。


呢件事如果發生喺大人既世界會係點呢?大家做咗咁多年野,我估大家都有唔同既處理手法吧?隨口講幾個:

  • 直接爆佢啦駛同佢客氣
  • 走去搵老細喺背後插佢
  • 同佢坐底define返個R & R
  • 同佢分開咁做,到present果陣一人一part。最好自己講先,到時淨係留返一分鐘俾佢present
  • 自己做定一份slides,有得佢攪share果份。present果日先拎自己果份出黎
  • 研究點樣喺Google Slides set security唔俾佢改到自己啲野

大家應該仲有其他方法吧?

不過…我最終一個以上既方法都無講到俾阿囡聽。

因為我細個果陣同啲大人或者朋友講學校發生啲咩事果時,其實大部分時間都唔係想佢「教」我點做。

我其實係好想話俾人地知,我想點做。

如果換成大人setting,即係…「唔好講咁多,飲啦」。


囡:(有啲激動)其實佢如果一開始諗住全部野都要自己做,點解佢要搵我呢?我覺得…同人合作好難….可能我真係唔識同人合作。

我:你唔係唔識同人合作呀。你放棄自己堅持要用point form格式跟佢做法,同埋你有努力去搵佢討論有無一個大家同意既格式,你已經處理得好好呀!

第一次合作啫,慢慢黎啦,同學仔都同你一樣係第一次合作做presentation,佢都係學習緊。不如你諗下下次你如果再同佢做project,你會點做?

囡:我會同佢講清楚咗點分工先開始囉。同埋我會話上次佢負責run d slides,下次應該到我囉。

我:幾好呀。你繼續諗下~記住同一件事有好多個角度。你無法控制到其他人,但你可以控制到自己掌握既野。所以唔好成日諗住「我說服咗佢跟我」件事就完了。問多啲野了解多啲,諗好自己可以做啲咩去解決先。

囡:呀!仲有….(下刪八百字)


點同人合作應該係一生既課題。

阿囡喺度返咗學幾個月,其實學得最多既唔係hard skills,而係soft skills。

因為hard skills宜家有Google唔駛你死記住了,YouTube乜都有得自學了;但soft skills更需要時間、經驗仲有對手去磨練。

有啲詫異佢今日返學面對緊既問題,其實已經本質上同我地大人做野面對既問題無異。

或者到咗佢地大個去見工,唔會再有人問你「有幾多年用microsoft office」既經驗,更有可能問既係:你有幾多年同啲麻煩友collaborate既經驗?

One comment

  1. 睇完女女講野覺得佢叻
    結果唔好但過程中佢學/遇到 同人相處 遷就 出現突發問題 再表達個人情緒
    100分寶戰學習!

Leave a Reply

發佈留言必須填寫的電子郵件地址不會公開。 必填欄位標示為 *

想睇到最新內容?

歡迎讚好「好校爸」Facebook專頁!