[姐弟海外升學記] (十二) 睇屋

黎咗加拿大之後,由開始睇屋到搵到dream house,大約經歷咗半年時間。

剛開始果陣我地無搵agent,睇屋都係自己上網 (e.g. https://www.realtor.ca/) 睇完之後,趁人地「open house」果陣再實地考察。Open house基本上就係間屋既開放日,如果你對間屋有興趣,你可以喺open house果段時間 (一般三、四個鐘)入間屋參觀。通常open house都喺weekend度攪,附近啲路會有路牌指示你前面有open house睇。

廣告
Loading...

自己唔知頭唔知尾咁睇咗幾次open house,越睇越迷離,不知從何睇起。咁啱老婆有親友介紹咗一個agent俾佢,於是我地就開始跟住呢個agent去睇。

好好彩地呢個agent唔pushy,而且每睇一間屋佢都會講好多野俾我地知,所以一路睇一路發現,原來喺度睇屋有好多野睇……

房屋種類

首先我發現原來呢度所謂既「屋」係有好多種:

Bungalow:一層過 (唔計basement),類似我地香港啲樓咁。

Bi-level:同Bungalow一樣,不過個basement會高少少,外面睇落去好似有一層半咁。

Split-levels:幻想喺你間屋度某啲地方起地台,升高咗既地方同原本個地下”split”咗做兩個level,有幾級樓梯俾你上落。Split開咗既level可以用黎分隔唔同既空間:例如升起咗果度整個客廳或者遊戲室。

Two / Three Storeys:呢個我䑁得似香港啲村屋 – 基本上係兩、三層既屋,每一層間隔相近。

我唔係專家,想了解多啲Calgary既屋種可以參考下呢個website

我同老婆一心想要bungalow,因為覺得split levels太多級,而且layout又複雜啲,應該會成日搵唔到弟弟。不過bungalow因為乜都喺哂同一層,空間又未必夠駛。所以睇咗好耐,淨係想搵一個啱心水既間隔都唔係咁易。

屋外環境

喺呢度睇屋,原來唔係淨係睇間屋。屋外既環境地勢原來都好緊要。

例如老婆叫我留意間屋係咪喺「corner lot」,係就唔好揀。點解?

廣告
Loading...

因為如果住corner lot(黃色圈果間屋),鏟雪就要鏟哂籃色果兩條街;相反隔離屋只需要鏟門前紅色果段路就可以了。對於我呢啲懶精黎講,呢個的確係一個好重要既因素。

另外,因為我唔識揸車,到學識成為初哥都應該仲係好渣。所以老婆話搵屋果時間屋唔好對住啲大路,如果唔係到時出車入車我就會好餚底。而且間屋對住啲主要道路肯定會好嘈 – 屋企果兩件都夠嘈啦,唔駛再搵多個嘈音來源俾自己……

屋內設備

如果你喺新區睇樓,我估呢一部分就應該無乜特別。不過因為我地決定喺舊區搵屋,所以呢一部分又變得重要。

除咗睇下喺香港都會睇既基本廁所、雪櫃、洗衣機等等之外;加拿大仲要睇埋個暖爐(Furnace) 同埋熱水器 (Water tank)。Furnace同埋熱水器如果太舊都要換,size唔啱又要換 (e.g. 兩人家庭可能40 gallon水就夠,但一個4人家庭就可能要60 – 75 gallon)。

有啲唔慣既係,有一樣家電喺香港睇樓一定有,但呢度無:冷氣機。

車房

喺香港你要泊車,屋苑樓下有停車場;喺加拿大你要泊車,基本上就係泊係你屋企。你屋企如果無車房,啲人會就咁泊架車喺屋企門口條街度。夏天都還好,不過一到冬天落雪,第二朝你架車就俾啲雪包住,攪一輪先出得車,仲要鬼咁凍。

如果你有兩架車,一個車房可能唔夠放哂兩架車入去,咁你又有機會要放一架係街度變雪條。所以我地搵屋果時好想搵到雙車房既屋,最理想就係個車房連住間屋既 (叫做attached garage),冬天出入就舒服好多。

不過同屋內設備一樣,呢個對於新區可能係一個default既設計,但喺舊區原來要搵一個attached garage亦唔容易……


喺度睇屋得意既地方係:每一間屋都好唔同,每睇一間都有啲唔同既發現。所以比起喺香港,喺度睇屋無咁predictable,每次都有啲新鮮感。

但又正因為呢個原因,先更加難搵到合心意既屋。喺香港睇啱咗個間隔後,agent可以幫你收窄範圍淨係睇某一個屋苑某一隻layout既樓;但喺呢度就算睇啱某間屋,如果價錢唔啱,你都未必可以好容易搵返同一個款式 (睇新區除外)。所以你可以想像當我地終於搵到我地間dream house果一下我地有幾雀躍,有幾快可以「扑鎚」。

不過我地好快又知道,開心唔好太早。

因為當我地睇到驗樓師果份成百頁既report,就明白我地當初睇既野係幾皮毛……

(待續)

廣告
Loading...

Leave a Reply

想睇到最新內容?

歡迎讚好「好校爸」Facebook專頁!