[姐弟海外升學記] (四) 搵學校

  •  
  •  
  •  
  •  
  •  

小朋友要喺加拿大讀書,一開始我既心態係:讀返街口果間咪得囉。因為諗住無論讀邊一間都好,都一定唔會好似香港咁功課考試一大堆。

不過,我老婆硬係鐘意將我諗住簡單解決既事複雜化。

廣告
Loading...

我家既兩個小朋友各有特色:家姐一直都係四平八穩,一個典型既generalist。佢既觀察力強,極度穩陣,樣樣野都先謀而後動。佢又成日都成個管家婆咁,弟弟出左世之後更明顯,感覺上佢比同年紀既小朋友成熟老積。以佢咁穩陣既性格,我同老婆都覺得佢喺香港讀乜學校都應該唔大問題。

如果家姐係generalist,弟弟應該係specialist。弟弟對數學同太空好有熱情同天份,k1就記唒成個乘數表同埋太空啲星球 (唔止八大行星),家姐小二既數學佢都攪得掂。不過與此同時佢既學習問題亦有一大堆,例如返學果陣成日發白日夢,唔係就坐唔定喺個班房行黎行去攪攪震,而且大小肌肉能力亦較同年小朋友差。

所以弟弟升小係其中一個我地移民既催化劑,因為覺得佢喺香港讀書會好辛苦。我同老婆覺得外國讀書應該相對活動啲,唔駛咁坐定定。起碼有乜事見家長都少啲丫……

我地開始認真研究加拿大除左傳統既學校之外,到底有無其他選擇適合佢。當初以為呢度只係得公立同私立學校,好彩老婆當地既親友聽完弟弟既情況,好熱心俾左好多資料我地參考;老婆其中一位朋友就介紹左一間學校,可能會適合弟弟。

呢間學校喺加拿大係屬於一種叫charter school既學校(#註:呢類學校好似唔係個個加拿大省份都有,我身處既Alberta就有),有少少似香港既直資。同樣係拎public school既funding,不過由教育局以外既一啲機構經營,課程上自主性比較大。

每間charter school都有唔同既學習主題,希望滿足到唔同類型小朋友既需要。而同直資一樣,charter school既入學要求都係學校自訂,而呢間學校就需要IQ test達到某個分數同埋interview。

我地當時仲係香港,老婆要喺香港搵一位心理醫生幫弟弟做IQ test,然後send返個結果去學校報名。起初諗住淨係幫弟弟做test,後來又諗反正弟弟都要做,不如家姐都做埋啦,費時第日佢話唔公平點解無佢份。

做完個test差不多兩個星期,醫生約我地去佢office睇報告。

首先弟弟既test result唔合乎間學校既資格。講真,呢個又唔算係太意外,尤其係聽完醫生既解釋:

醫生:「佢其實全程都無坐定去做呢個測試。佢成日望住我個計數機想拎黎玩;一有計時果啲環節佢又掛住睇住個鐘。如果你想準確啲,建議你等佢大少少再做過。」

廣告
Loading...

我同老婆互望一眼,大家心裏面都諗:咁報返public school啦。

點知呢個時候,醫生繼續講落去:

「不過,家姐個test好高分。你地可以幫佢報果間學校。」

吓? 我同老婆又互望一眼,唔係掛。

我爭啲想問個醫生:乜宜家IQ test係考駁嘴㗎?

我:「晤……佢其實平時啲數學都係一般㗎咋喎……」

醫生:「 個測驗唔係單係考數學既;佢既能力可能係宜家佢讀小二既學科入面反映唔到出黎,但之後你就會慢慢發現得到。」

咁…又唔駛慢慢發現既。佢宜家啲駁嘴係已經好勁,仲駁得好有邏輯添。

就係咁樣,我哋由幫弟弟搵學校忽然變咗幫家姐轉學校。我地快快手將份報告send左返去學校正式幫阿囡報名,等待學校回覆佢有無得參加interview。

當然,世事往往都無咁straight forward既…

(待續)

Photo credit: justine warrington

廣告
Loading...


  •  
  •  
  •  
  •  
  •  

Leave a Reply

想睇到最新內容?

歡迎讚好「好校爸」Facebook專頁!