弟弟間幼稚園開學無耐就派通告邀請家長幫小朋友報名面試班，令我地意識到升小遊戲好快又再開始。
其實自從家姐考幼稚園要面試開始，我就成日好好奇到底呢啲幼稚園同小學面試係點揀啲學生架呢？尤其係in PN班果時其實小朋友都應該係一歲左右，基本上爸爸、媽媽、香蕉同猩猩對佢地黎講可能都係差唔多既野。老師憑咩係果20分鐘內知道要收邊個呢？
我估其實同大人見工一樣：最緊要都係睇你順唔順眼吧？
當年家姐讀K2果時，我同老婆完全無諗過要幫阿囡報任何面試班。覺得如果佢走去機械式咁記住人地教佢啲答案，佢臨場答果陣一定係十級唔自然。最怕佢係原本正正常常識答，但因為上左堂後掛住諗返面試班人地教佢點答，最終反而答唔出。
但到左弟弟，今次就無再用「同家姐一樣咪得囉」策略了。
點解？
因為以弟弟既性格，就算上左面試班，都怕且唔會記得人地講乜同要佢點做，所以真正稱得上nothing to lose。咁啱宜家學校主動自己攪面試堂，有主場之利之餘又俾出面既班平，當俾佢適應下到時面試係點都好丫，於是就幫弟弟報左名。
弟弟暫時返左三堂，拎左三張工作紙返黎。上面基本上都係一啲問題比小朋友練習，學下自我介紹，答人地自己叫乜野名、幾多歲；又或者係講下自己屋企，例如邊個接你返學放學、邊個同你做功課之類。
今個星期既工作紙上出現左呢條經典問題：你最鐘意屋企邊個呀？點解？
雖則都知自己「當選」既機會好細，不過都鼓起勇氣問左弟弟。
我：「弟弟，你最鐘意屋企邊個呀？」
弟弟：「我最鐘意媽媽、爸爸同埋家姐。」
我：「最鐘意喎。揀一個咋喎。」
弟弟：「我全部都一樣鐘意。我鐘意媽媽、爸爸同埋家姐。」
面對非一般倔強既弟弟，我知道再問多十次個結果都係一樣。其實諗落，邊個話最鐘意既淨係可以得一個呢？或者呢個唔係一般面試所謂既「model answer」，但對於我地一家幾口黎講，應該係最窩心既答案了。
講真，我估都好難有人可以講得出到底面試班對考到心儀學校有幾大幫助。身邊總會識得一啲小朋友上過面試班而無offer；但同時又識得一啲小朋友係冇上過面試班而又有幾個offer係手。正如上面咁講，本來啲直資或者私立學校點樣收生，都係無乜路捉 – 至少我唔識捉。
所以我有時覺得面試班有啲似保健產品：小朋友上左感覺良好，咪用囉；上左無feel，咪唔好用囉。
我反而覺得可能俾家長去上下呢啲面試班會有用多啲：先唔講會唔會幫你小朋友考到學校，但至少俾個機會兩公婆一齊面對呢場遊戲同早少少夾定口供，總好過係真係interview果陣先係老師面前大家互插互「片」丫……
