Skip to content

播道簡介會2017

簡介會大大話話都有去左十個八個,若論最富娛樂性既一定要數播道。點解?唔係因為有豐富學生表現節目,而係校長近乎棟篤笑既學校簡介。

盧校長定林校長?

成個播道簡介會基本上係盧偉成校長既個人talk show。盧校長一開始就話自己成日比人話佢似林峯(真唔真呀…),所以佢話宜家叫佢做林校長佢都會應。雖則佢無好似林峯咁拍電影或者電視劇,不過原來佢係有係電台度主持一個叫人仔細細既節目,講下教小朋友既心得。

唔好「做底」孩子

盧校長係呢個簡介會入面分享既教仔教囡心得其實仲多過介紹間學校。盧校長覺得學校同家長最緊要係多d鼓勵小朋友:

要「做起」佢地既信心,唔係成日話佢地、「做底」佢地

小朋友做得唔好淨係話佢係無乜用。比小朋友係一個有愛同鼓勵既環境下讀書係播道好著重既地方,校長希望播道既學生係「學得認真、活得開心」。

「列子學射」既學習精神

盧校長又好鐘意中國古文;佢話如果你中文作文quote到句中既古文開頭,篇文都勁好多。係簡介會度佢引用左一篇古文叫做「列子學射」:

個故仔係話從前有個人叫列子,佢跟師傅關尹子學射箭;學到佢射中左,師傅問佢知唔知自己點解射中,佢唔知,師傅就要佢再學過。如是者過左3年,師傅再問列子知唔知點解射中,列子話知道,師傅就終於ok了。

校長用呢個古文,想講播道既學習精神係唔會淨係睇學習成果而忽略學習既過程;除左獲得知識,亦要明白箇中道理。

木人巷

木人巷本來係形容少林弟子落山果陣要用所學打過呢條巷,証明自己既實力。播道入面原來都有條叫木人巷既地方,表現係12個唔同領域度有傑出表現既學生。

同少林寺果條木人巷唔同: 呢度無十八銅人阻你落山,不過就擺左d學生既作品係度表揚佢地既傑出表現。

社會議題表態1:普教中?

盧校長又就2個都算具爭議既教育議題為播道表態。第一個係到底用唔用普教中?

校長話佢地唔相信普教中d中文先會好d,最緊要係識字同閱讀。所以學校係用粵教中,普通話會係另一科比小朋友上。

簡單地講個授課語言:

用英文教

  • 英文
  • 數學
  • 常識

用中文教既

  • 中文
  • 普通話

 

社會議題表態2:國民教育?

第2個議題:攪唔攪國民教育?校長話攪無問題,有問題係如果係拎黎洗小朋友腦:

結語

最後盧校長寄語「人在做,孩子在看」總結成個簡介會。由於盧校長眉飛色舞地講左好多教小朋友心得,比起其他簡介會佢介紹個課程既時間其實好少。不過倒係幾鐘意校長愛小朋友、尊重小朋友既想法。校長係簡介會入面不停咁講「精誠所至 金石為開」,唔知係咪要勁寫信同埋好似fans咁等佢放學佢先收呢…

3 Comments

  1. Cara Cara

    你好想請問你點睇播道同真道?因為真道讀11年我始終有啲擔心,所以對播道既興趣大啲,因為唔想小朋友有太大的讀書壓力

    • 好校爸 好校爸

      Cara你好!

      其實兩間學校我都鐘意,兩間都有考,不過播道無收我個囡,第一回合就收左工。

      阿囡無讀播道所以我無從比較,不過有朋友個囡讀緊覺得好好又唔算好大壓力(可以參考下呢篇)。

      至於真道…相信你睇下我個blog就會明白我鐘意佢啲咩吧!我覺得佢地返學真係無乜壓力,至少唔駛做功課同考試奴。我估若你係想「穩陣」- 同一般學校唔差太遠,或者播道會比真道好啲吧!真道某程度上係不歸路:因為11年太獨特,若你唔鐘意佢,怕且你都轉唔到去第2間。

      • Cara Cara

        麻煩曬你,囡囡剛完成真道面試,之後會報播道,一切就睇佢造化!
        多謝你為大家提供既資訊

發表回覆

你的電郵地址並不會被公開。 必要欄位標記為 *