真道一年級迎新日2

  •  
  •  
  •  
  •  
  •  

3月先參加左第一次真道一年級迎新日,話咁快就到part 2。上回個形式似簡介會咁介紹學校特色,今次就以課堂形式比小朋友親身體驗小學課堂係點。

曹校長致辭時話今日小朋友好幸福:自己細個果陣佢爸爸淨係帶左佢返第1日學,之後就無乜理佢返學返成點。校長建議大家最重要做2件事-第一要做好role model比小朋友睇,第二要同學校一齊齊心教。當然有野係學校先學到,但亦有好多野係屋企先教到,話返比我地咁多個家長聽:唔好以為過左9月就可以「曹校長,我個仔/囡就交比你了」。

廣告
Loading...

之後到左分組時間,全部人分成8組咁試4堂唔同科目。上晒4堂仲有得儲襟章添。

英文堂:English is FUN!

我地第一堂先上英文堂,外藉老師教phonics – oa:

個老師講左一個故事(好似一個伊索寓言),大約係:有隻叫Joe既goat行行下road睇到有一loaf面包,佢想執點知跌左落個窿;好彩有個人路過個oak tree之後見到Joe goat,結果又用coat又用boat救返Joe goat,仲大家share埋個面包一齊整toast。

老師一邊講個故仔一邊引入d生字,每講一個就叫d同學跟佢拼讀。個老師都幾生鬼,攪晒笑扮晒動物叫,贏到好多小朋友既笑聲(阿囡笑點好低,唔意外)。

3D Pen

跟住到第2堂 – 呢堂唔知算唔算STEM? 大鄉里唔知原來有樣野叫做3D Pen,可以比你用支筆直接畫d膠出黎,d膠乾左就會凝結可以造型。睇睇呢條片你就明:

今次學校準備左d 圖案比小朋友跟住畫,仲特登整幾個for父親節既圖案比d小朋友冧下爸爸:

製成品:

科學堂:動手做磁石鴨

廣告
Loading...

上次迎新日已經講左學校一年級科學堂就會比佢地做實驗;學校重視小朋友自己動手做,從中觀察同埋思考。今次試堂要做既一隻有磁石既鴨。睇個包裝同老婆上次淘果個STEM套裝有少少似曾相識:

阿囡跟老師指示好似砌模型咁砌返隻鴨出黎,都算幾簡單。老師一路會問d小朋友如果用個磁石棒移去隻鴨唔同位置隻鴨會有乜反應,從中引導小朋友自己發現同性相拒、異性相吸既磁石原理。

完成圖:

音樂堂:非洲鼓

最後一堂係音樂堂,係上次迎新日睇左d哥哥姐姐表演打非洲鼓,今次就直頭自己有得打。

真道既非洲音樂係其中一個聯課活動,同學一年級都可以揀黎玩。玩左鐘意又玩得好仲可以參加校隊,唔同年級可以學既非洲音樂都有唔同,唔單止得非洲鼓。

老師同幾個同學介紹左唔同既非洲音樂,跟住就請晒d小朋友一齊出去玩一齊夾。睇見個個小朋友都玩得好high好投入;弟弟臨走都要走埋去打返幾下。

尾聲

完晒4個活動跟手排隊買埋校服就走得,叫做玩左一個上午。仲記唔記得一開始話玩晒4堂有襟章送?我地看似微不足道既野,永遠都係小朋友反而會著緊既野。阿囡好興奮咁同我講: 「我儲晒7個呀!」,仲要我同佢地影相。當然,當有Disney Frozen襟章既時候,呢7個寫埋校訓既襟章唔排除會被擺埋一邊…….

好希望到左9月阿囡返學果陣,佢會好似今日咁enjoy返學既時間,笑住咁放學話我知佢玩左咩實驗學左咩英文故事,唔駛做功課同考試奴隸啦。

8月仲有part 3,唔知到時又有乜玩呢?

 

廣告
Loading...


  •  
  •  
  •  
  •  
  •  

Leave a Reply

想睇到最新內容?

歡迎讚好「好校爸」Facebook專頁!