Skip to content

[讀家消息] (七) 點解要揀梁省德(坑口)?

有睇開呢個blog可能會發現我比較多時間講直資或者私校。除左因為自己個囡讀緊直資,另一個原因係寫官津真係要有少少地方智慧,而且更難係搵到家長話俾你聽學校既情況。

今次我特別搵左一位朋友講下將軍澳坑口既一間津校 – 基督教神召會梁省德小學係點。希望係將軍澳住又準備幫小朋友搵津校既家長可以多一個參考,更加希望會搵到越來越多唔同學校既內容同大家分享!

問:點解你會揀呢間學校?

答:自己有兩個小朋友,所以我一心諗住報津校,細佬可以直接跟埋入去讀,唔使煩兩次。而呢間學校,有自自己幼稚園校長介紹,又有朋友的仔讀緊,大家都對呢間學校有正面的評價,我個人又好喜歡呢間學校的外觀,以彩虹色彩粉飾校園,讓人睇見心情都開朗d,校園又好靚,又近屋企,又配合到我們的信仰,所以揀呢間學校。

問:學校課程有乜特色?

答:自從轉左基督教神召會為辦學團體,課程發展得幾好,引入不同元素以豐富課程。學校小班教學,上堂以小組形式俾學生更融入課堂。

以英文科為例,活動式教學,上堂時老師會叫學生「出基地」,意思係離開自己的座位,齊齊搬課室內的圓櫈仔去到黑板前,方便佢哋上堂,唔會局限於自己的座位。至於課本,以學校自編的故事圖書作教材,讓課程變得生動,學生更易吸引。仲有,學校引入Phonics拼音課程,有助同學認記字詞。

另外,學校都好細心及有遠見,由小一起已為升中銜接作好準備,數學及常識科加入了英文教學元素,分別有「Fun Maths」及「Fun Science」,獨立成科,讓學生自小一就接觸認識,在升中後更易適應。

最後,我想介紹佢哋的「魔法數學」課程,呢科無功課無測考,所以學生特別喜歡,我有上過佢哋的體驗堂,其實係由淺入深逐步加入奥數的原素,增強學生解難能力。我的小朋友會將上堂學到有趣的theory回家同我哋分享,真係幾有趣。

問:你宜家最鐘意呢間學校既係咩?

答:其實讀左大半個學期,作為家長的我真係越來越鍾意呢間學校,呢間學校不會以校內成績作為學生的定位,反而會幫助學生係不同層面,例如藝術培訓、體育訓練,發掘自己的潛能,挑戰自我。

我喜歡佢哋以小組式上堂,經常分組進行活動,讓學生懂得與不同的同學相處,互相幫助包容,彼此配搭。

我又好欣賞學校會積極聆聽家長的意見,並加以改善,真正做到家校合作。

問:學校功課量如何?

答:我諗津校的功課量都係多,每日有6-10樣,但我覺得唔好俾量多而嚇親,其實改正都算一樣功課,但如果做得好就唔使改正,第二日就少一樣功課。另外,上堂有功輔堂,如果學生肯認真快手做,回家做的功課不多。

其實小朋友係較易適應,回想起,我的小朋友比開學初,做功課已不知不覺進步左,快靚正,每晚仲有時間輕鬆玩下。

問:學校默、測、考量同埋深淺如何?

答:每星期有中、英文默書各一次,每學期就有兩測兩考,全學年共有四測四考。學校好細心,完成左測驗考試後,通常都會安排活動慰勞下學生,例如上學期期末考試後,學校有Care Cafe,果日唔使上堂,學校搞個校內嘉年華俾學生去狂歡下。

我好明白大部份家長都唔想子女入多測考多默書的小學,呢個都係其中一個原因曾經令我對呢間學校卻步,但感恩我最終入讀呢間學校,因為看見我的小朋友同學校的教學方式夾到,所以佢進步得好快。

都想借個機會為呢種多測考多默書的學校平反一下,其實keep住温書,小朋友在考試上真係會輕鬆d,因為測驗測左,考試就可以會放輕d,所以最終無咁辛苦。

最重要係小朋友同學校的教學方式配合到,開學頭一定要適應,各方面磨合,俾小朋友空間去適應,家長同學校多溝通表達,唔好一黎就判斷對與否,家長係子女面前對學校的評價都好影響佢哋點諗。

問:學校多唔多活動 (課外活動、家校活動, etc)?

答:我喜歡學校有好多活動俾學生嘗試玩,從中發掘自己喜好。

小息時,學校都預備好多多元化的設施俾學生玩,如:英文室有外藉老師同學生交流,有時睇英文影片有時玩遊戲;STEM room有四驅車及 Hot Wheels,俾同學借黎玩;圖書館經常有獎勵計劃,鼓勵學生多閱讀;操場有球類活動,有負責老師在場,教下學生點掌握,又可以俾同學伸展一下。

另外,學校定期會於小息時安排班際比賽,例如有跳繩、接力、競技,讓不同年級的學生一齊支持打氣,又透過呢d比賽,令班裏更團結,唔使等到一年一度的運動會先有得玩。

家校活動都有好多,讓家長可以經常以義工身份參與其中,定期有小息藝術工作坊、獎勵計劃換禮物、親子農莊、親子旅行、等等,家長可以更了解子女平時係學校的生活。

頭先講過的Care Cafe,都係其中一個家校合作的活動,當日我都有份參與做家長義工,見到老師及家長們為同學預備了很多玩樂的攤位,又有彈彈床,又有寫心意卡打氣,又有爆谷棉花糖,又有食物,又有禮物換,見到學生們真係好興奮,我作為家長義工都好開心滿足。

問:有咩你覺得學校可以再做好d?

答:其實整體上真係好滿意,我唔太清楚其他小學,所以無得比較。我覺得最重要係小朋友同學校夾到,家長同學校配合到,已經好好。

問:有無其他關於學校既野想同其他家長分享?

答:我明白每位家長都好想子女讀神校讀直資,但即使失落左,都唔需要太傷心迷茫,其實只要放眼周圍,身邊都有好多辦學有誠意的津校,只要揀岩一間合適子女的,一樣可以讀得好好,揾學校要揾合適的,而不是揾最好的,因為世上沒有最好只有更好,相信上天必會預備最合適的學校。

最後,感謝好校爸呢個平台,俾我哋咁平凡的家長可以發下聲,講下真正的用家感受,俾讀者更具體地了解學校。

Be First to Comment

發表回覆

你的電郵地址並不會被公開。 必要欄位標記為 *