Skip to content

[讀家消息] (六) 點解要揀港同?

當年同阿囡考小學,港大同學會小學(簡稱港同)係其中一間我同老婆都心儀既小學;仲記得連阿囡間幼稚園個校長都有特別推介呢間小學俾我地識。

到底港同有乜吸引力?今次由一位港同既熱心用家同大家分享呢間位於柴灣既一條龍小學有乜特色!

問:點解你會揀呢間學校?

答:揀呢間學校因為佢地採用活動教學,重視閱讀同埋團體合作,更着重思辨、創意同埋溝通。學校本身係band 1龍校,100%直升,唔太擔心佢地升學既問題。

另外,學校好多興趣班俾小朋友參與,同時又少功課、少抄寫。頭兩年無考試測驗,有評估,但唔需要俾家長知。課程又唔會特登要教快,小朋友容易handle。

問:你覺得小朋友有咩特點呢間學校會收佢?

答:有禮貌,懂禮讓同埋分享。英普都ok,可以表達自己。有創意和富有想像力😂 (成日發夢) 鐘意畫畫,較活潑。

問:你宜家最鐘意呢間學校既係咩?

答:最鐘意小朋友可以從遊戲中學習;學校推行正向教育,俾小朋友好多鼓勵!

上課既模式好多時會分組討論,經常有presentation,令課程好生動。例如佢地教一本書叫green eggs and ham,會上堂請家長義工去炒蛋加食用色素,變綠蛋俾小朋友食。小朋友覺得好amazing and disgusting 🤣,但同時又超開心,令到家長都好積極參與。學校亦經常鼓勵同學之間互相欣賞,寫低對方優點。其實每堂都有佢嘅特色,老師都要經常進修!

下午上既堂亦相當有趣,講緊唔係學術堂,而係有趣既活動課程。當中包括drama、武術、律動;又有跳舞,有小楝樑 (係家長去帶活動,玩遊戲)。

學校亦真正做到有教無類,雖然入學條件比較高,但如被獲取就可以一直讀到上中學,唔會踢走學生。

小朋友返學開心,又學到野;家長無乜壓力,功課量少又有趣,活動多而有趣,家校合作緊密。

問:學校功課量如何?

答:功課每日3至5樣,每日要求閱讀,但唔駛寫book report (連title都唔駛),只係填顏色證明一下。

功課好少抄寫,多創作,要用腦思考嘅,小朋友可以獨自完成。有時睇完書返學校同同學分享,講多過做 😆。

問:學校默、測、考量同埋深淺如何?

深淺較其他直資淺,輕鬆嘅,無測驗考試,三年級才有,英文默書無同佢溫過,中文好似只係默咗三次,有詞語和短文,讀默。

問:學校多唔多活動 (課外活動、家校活動, etc)?

答:學校除咗課堂時活動多,下午既特別課堂例如武術、跳舞、話戲等等,全部都屬於正規課既一部分,二年級仲會有游泳堂。課後仲有各種類型既課外活動,俾小朋友自由選擇參與。

家校活動特別多,間中會有家長講座,又會邀請家長做家長義工,協助小朋友在校既學習,令家長更了解小朋友係學校既學習過程,更有歸屬感!

黎緊嘅open day,家長亦有好大程度參與。會有攤位遊戲,扭氣球🎈,仲有髮夾義賣,全部都係家長負責。又正正因為學校活動多,家長又好積極參與,所以家長之間容易熟落,間中會自組活動。

問:有咩你覺得學校可以再做好d?

答:無乜補充,覺得學校已經做得好好!唔知其他學校點,所以亦無得比較 🤣。

問:有無其他關於學校既野想同其他家長分享?

答:想對讀者說,順其自然,總會有適合既學校等緊你!現在每間學校既教學辦學都有要求同質素,唔駛過份憂心!

Be First to Comment

發表回覆

你的電郵地址並不會被公開。 必要欄位標記為 *