Skip to content

[阿囡學coding](四) – Digital Citizenship

如果你睇左呢個blog已經有一段時間,或者知道我其實係阿囡升小果年既暑假有試過叫佢學coding。阿囡當年暑假都學得幾高興(因為有Elsa),不過小一一開學就忙到遊魂,所以結果無再學。宜家既然佢停課無野做,不如試下再俾佢學返。

今次我打算跟住Code.org上既CS fundamental黎教佢。Code.org係一個非牟利既機構,佢地除左開放Hour of Code呢個平台俾大家免費去玩住學coding之外,佢地亦有一個好structure既course (連埋啲course material)俾小朋友學習。

例如我今次諗住俾阿囡試既係CS fundamental既course C,適合二年級既小朋友。成個課程總共有18堂,由淺入深;唔好以為學coding既堂一定係全程對住電腦,課程既第一個單元講既野同coding無乜直接關係,而係講…可能你覺得有少少老土既「如何正確使用電腦」。

Digital Citizenship呢個單元首先講咩係網上欺凌。阿囡其實上網上得好少,所以都唔係好知係咩黎。我結果先俾佢睇左下面條片等佢認識下先:


睇完之後,我再重播一次,然後一邊停,一邊問佢再一邊講啲日常例子俾佢聽。例如我講左俾佢知咩係Facebook,我地點樣share野(only to friends定to public),咩係like,咩係comment。當然,係無講過俾佢知我有寫blog……

講完之後,俾左張工作紙佢睇;內容非常簡單,勝在個website連呢啲教材都已經幫你準備好埋。

第2 part講下點樣set password。呢個topic都幾得意,我都無跟佢啲內容,直接問阿囡知唔知係咩黎。

我:「你知唔知咩係password?」

囡:「我想用你部電腦果陣要入果啲野囉。」

我:「 咁點解要用password?」

囡:「因為你唔想我地無啦啦用你部電腦同電話。」

我:「係啦。password基本上係禁止啲唔合適既人去使用一項設施。你樓下都有password,就係唔想啲唔識既人走入黎嘛。咁你知唔知應該點set一個password?」

囡:「唔知呀。」

我:「要好難估到既。例如我個password用我個手提電話或者我生日,咁識得我既人咪好容易入到去囉。太短都唔得,例如就咁「1」,咁人地好容易撞中。」

老婆跟住講左個有關password既趣事俾阿囡知:原來台灣有好多人鐘意用「ji32k7au4a83」黎做password,外國人諗爆頭都唔明呢段字有乜特別(睇落好random下)。原來呢段字用台灣注音輪入法打出,就會得到「我的密碼」呢4個中文字;同人地用「password」做password一樣(咁衰)。

最後我講左一個真人真事俾阿囡做總結:話說我老闆有一日食飯行開左無用password鎖實部電腦,結果我有個同事整鬼佢,用佢個outlook send左封email俾成條team,話請我地食飯。

老闆好nice無嬲,最終請左我地食野之餘,仲語重心長咁提醒我地:千祈要小心自己既digital access。如果唔係,要還架……

同阿囡睇完一課,除左覺得宜家既小朋友真係好多野可以學之外,其實大人都一樣。網上既資訊實在太多,想真正幫到小朋友去學、去吸收,與其係禁止佢地去用去explore,倒不如自己參與其中。

所以我決定左 – 每日都要花多啲時間鑽研多啲online game,以應付未來小朋友既發展 (好似係)。

Be First to Comment

發表回覆

你的電郵地址並不會被公開。 必要欄位標記為 *