阿囡小一上學記寫左二十幾回，大大話話都寫左好幾次佢默書：由開學初出現化功大法，到開始找到竅門再到後來既信心滿滿；諗住佢默書都已經叫做自己攪得掂，點知竟然仲會甩轆。
五月中一個long weekend，抓緊機會約埋同學過一個有趣既camp trip；返到黎見阿囡都算生生性性做晒功課準備好返學，好有「老懷安慰」既感覺。
返左一日學之後，夜晚又同阿囡check 功課；check check下忽然心血來潮覺得好似好耐無默過書，於是隨口問左阿囡一句：「呢個星期有無默書呀？」
阿囡不假思索、斬釘截鐵地答：「無呀」。
呢輪其實自己成日無乜精神又心不在焉，比起開學時對阿囡啲功課亦無咁緊張，於是採取「反正我就是信了」既態度，無再深究。
果然，當你鬆懈之時，就係瀨野之時。
到阿囡上床訓左之後，老婆忽然問我：「呢個星期唔係中文默書咩？」
我：「唔係呀，問阿囡佢都話無。」
老婆：「唔係喎…見啲家長係個group度講緊好似唔知係聽日定後日喎。」
快快手進入神聖且權威既家長group度一睇：好似真係要默書喎聽日。
再拎阿囡本手冊出黎翻閱，終於發現：原來係兩、三個幾星期前既手冊度寫左係聽日要中文默書，仲要一次默兩張紙。
果一刻坦白講係有少少心虛，覺得點解連自己都唔記得左。不過，唔夠一陣自己好快又產生第二種想法。
我：「佢都訓左啦，無辦法。」
老婆：「聽朝佢訓醒話返佢知等佢溫囉。」
我：「不如……唔好話俾佢知，等佢返到學校先發現，咁佢咪會好深刻記得下次要自己mark底囉。」
5分鐘之前先話有少少心虛，但5分鐘後已經變成大家討論點樣增強呢個驚嚇效果。
老婆：「佢朝早知都好驚架啦，聽朝攞底張紙俾佢等佢得少少時間準備囉。」
的確，我同意阿囡係好容易就好緊張，朝早先發現對佢黎講已經好夠驚嚇。於是我就放左佢要默果兩張紙係枱面，等佢訓醒食早餐果時發現。
到左第朝，阿囡起身，老婆係佢食完早餐得返十五分鐘果陣提佢今日其實要默中文。阿囡聞言色變，果然即刻用埋果少少時間溫兩張工作紙（雖然只係默大約十幾隻單字）。
夜晚返到屋企，同阿囡傾返件事：
我：「你今朝發現你唔記得溫書你心情係點架？」
囡：「好驚囉。」
我：「係呀…俾著係我我都會驚。咁你後尾溫左幾耐呀？」
囡：「溫左兩次，十五分鐘。」
我：「咁你今日識唔識呀？」
囡：「識掛。不過媽媽教左我下次如果隔咁耐先默可以係家課冊默之前果日再寫提下自己囉。」
我：「點解今次咁快就溫得晒？同平時默書有乜唔同？」
囡：「因為今次無乜時間，所以好專心溫囉。」
回想一下自己，其實又啱喎。返工幾時做野做得最快？咪就係就黎deadline果時囉。
今次算你好彩…下次唔提你等你自己衰左慢慢自省啦。
