Skip to content

[阿囡小一上學記] (二十六) 你爸爸做咩架?

阿囡學校最近攪左個講座,請左兩個唔同職業既人同學生分享佢地既工作。阿囡返到黎興高采烈咁要我估係咩職業:

囡:第一個職業:人地會叫佢做師傅既。

心諗你呢個提示,同問人:有邊個職業係啲人會叫佢靚女或者靚仔差唔多。

我:剪髮。

囡:唔係。

我:揸的士(我見個個都叫司機做師傅)。

囡:唔係呀,點會呀。

我:整蛋糕。

囡:差唔多啦。

我:廚師!!

囡:終於啱啦。

我:第二個呢?

囡:第二個職業好緊要呀,全部人都需要佢架。

我:醫生。

囡:唔係。廚師都要呢個職業先做到野架。

我:農夫。

囡:唔係。

我:…… 開估啦。

囡:係售貨員呀!

我:咁……關個廚師咩事呀……

囡:佢賣野俾佢煮囉。

我:…… 好……(感覺被騙)

阿囡話呢個講座係喺佢多元智能課果時上既。兩位講者都有介紹下佢地做既工作內容;例如廚師會解釋俾佢地知由入行要幾過幾多層先可以埋去煮野(初頭淨係切野)、煮野果陣用既工具同設備(阿囡問我知唔知咩係水枱)。

堂上亦有發問時間,俾啲同學問兩位講者關於佢地工作既問題。問阿囡有咩想問,佢話佢想知如果個廚師拋鑊失手打爛左隻鑊會點。

咁咪大鑊囉。我係心裏面諗,無答到佢。

好奇心驅使下,忍唔住問阿囡:你知唔知爸爸其實係做咩架?

出乎意料地,阿囡都竟然講得出個keyword。雖然跟手問佢即係做咩既,佢都答唔出。可能曾經聽過我同人地講過下吧。

有時候有啲羨慕人地啲爸爸果啲職業係一講就全部人都識果啲。例如以前阿囡有個同學個爸爸做警察,一講就明。而且覺得呢類工作大概應該過多好多年之後都仲會有吧?反而自己打緊果份工,過多幾年就俾AI取代了。

不過我估最有興趣知道我做咩既,唔係阿囡,而係我老闆。

因為佢應該日日都係度諗:都唔知請你返黎做咩。

Be First to Comment

發表回覆

你的電郵地址並不會被公開。 必要欄位標記為 *