Skip to content

[阿囡小一上學記] (二十四) 校長:談知識與閱讀

終於有時間整理返之前家長講座既資料。今次又輪到曹校長主講,延續返佢上一次講既「8大逆轉人生既能力」。成個講座內容同上次一樣豐富,係度只係節錄兩個主題:知識與閱讀。

談知識

何謂知識?校長話宜家俾個金礦你,你會點做?掘金啦梗係。但係點掘?用手?掘掘下你就發現有限制,有野唔work。你發現你需要工具,例如係個鏟,令你更好咁去拒金。

知識,就係我地既工具。

獲得知識既方法有好多種,但校長話好多人,尤其中國人,成日都忽略左其中一種:去累積失敗。

原來萊特兄弟第一次試佢地個飛機既時侯,只係飛到幾秒就跌返落黎。但無佢地既失敗,你同我今日都無得成日返鄉下(去日本)。

所以校長話唔好驅走失敗。等於你唔會走去驅走自己個影一樣,因為之所以有影,係因為有光。讓失敗成為知識既來源,成為成功既踏腳石。

談閱讀

另一個好重要既知識來源就係閱讀。

校長話有時都幾攪笑:我地鐘意閱讀既人唔睇書會死;但佢啲仔女調轉,一睇書就會死。

校長舉左好多唔同既例子講一啲underprivileged 既人點樣憑閱讀扭轉命運。校長又講左Bill Gates既綴學故事:點解佢quit哈佛大學佢爸爸都好放心?因為佢知道就算佢唔返學,佢都己經係大量閱讀中獲得知識。

但校長最後想講既反而係:唔好以「可以扭轉命運」既心態去讀書。校長話如果你閱讀完,老婆又靚仔女又聽話,呢個係bonus,但唔會閱讀既目標。唔好同仔女講:讀多啲書好呀,第時叻過曹校長。閱讀完叻過曹校長係by product,但最重要既係從閱讀中獲得內心既自由。

咁讀乜書好?校長話其實唔係無謂書就好了。

如果佢睇睇下英文書之後走左去睇《空手道如何進級》,唔好阻止佢,因為只要係有知識既書,總有機會用上。最重要係俾佢融匯貫通所學就是最好。


咁睇書有無啲咩特別既技巧?出乎意料地,校長話其實睇得太慢係唔好:因為反而係悶親你個腦。如果你能夠吸收,其實用一個比較快既速度睇反而先係好。

學習與人生的意義

最後,校長問:點解人要去學習呢其實?

校長覺得,我地要有長遠、有意義既人生目標,咁我地既學習就會黎得有意義。如果我地想我地既子女既學習有意義、識得追尋自己既人生目標,咁我地作為家長首先要自己做到。

聽完校長呢番話感到格外沉重。因為覺得自己枉活多年,實在無諗過有啲咩人生目標或者意義。

細個讀書為左考試;大個左學野為左搵食。

不為什麽地想學一樣野既果種熱情,到底係幾時失去既呢?

Be First to Comment

發表回覆

你的電郵地址並不會被公開。 必要欄位標記為 *