Skip to content

[阿囡小一上學記] (二) 小學生都要跑數?

阿囡開學一個月左右,放學食完飯過後雖然有時仍然處於walking dead遊魂狀態;但平心而論,其實阿囡間小學唔算多野做(比較聽返其他家長既故事)。不過最近我發現,原來阿囡除左要交齊功課,學校仲有一個比佢既目標。

話說阿囡間學校非常鼓勵同學閱讀,所以中、英文科都有閱讀奬勵計劃。成個計劃係自願性質,開學時學校會派reading log (英文書) / 閱讀存摺(中文書)比學生mark低自己睇書既紀錄:

小朋友每睇完一本書,係reading log度寫返書名、作者、頁數同埋學到咩生字(或者最鐘意邊個角色)就ok了,唔駛好似我地細個咁又要作感想又要答本書既內容(成日唔明以前細個點解成日要寫讀後感,講真讀完成本書仲要寫報告就梗係感到攰或者憤怒架啦,仲有乜感想丫…)。參加計劃仲可以有奬攞:睇夠30本有優異奬、40本有銅奬、50本有銀奬、60本有金奬,再多仲可以競遂全級大奬。

作為一條書蟲,我同老婆都好歡迎學校既安排,一來有奬項同埋有百佳儲印花feel既reading log motivate小朋友習慣睇書,二來填寫紀錄相對簡單,唔算變相做多份功課,大人細路都唔會反感。

唯一比較有挑戰性既,就係全部一年級既同學都要開學時訂立好今年中文同英文睇圖書既目標,然後係本reading log度簽名。

呢個moment不禁心諗:咦,咁似啲老闆同我地年頭set target比我地跑數既。

而當我同阿囡一齊揭果兩本reading log既時候,複雜既心理戰來了:

  • 每本reading log可以比你一年寫60本書,咁你到底應該set一個咩target比自己呢? 少過呢個數…又好似唔係好正路,等於老闆比左上年個target你,你同佢講話一人行一步,不如打上年個target 8折咁。
  • 但你又其實有數得計,你要多過呢個數,等於每星期都大約要完成幾本中、英文書,我又未好想像到仲夢遊緊仙境既阿囡點樣仲有時間精神坐定定每晚睇一本書。

呢個時候,我決定真係做返老闆一樣會做既事:就係諗多無用,直接將個波交比佢睇佢點講:

:學校宜家比你地訂返今年睇圖書既目標,你英文同中文書諗住想上學期睇到幾多本書?

:唔知呀,應該交幾多本呢?

:兩本存摺都各自有60格比你寫,計返大約你每個星期睇幾本中、英文書度啦。

:咁英文我上學期寫60本啦!

內心有少少複雜:見佢咁長進好開心,同時又驚佢交唔到數。原來我地啲老闆真係唔易做:你唔長進,佢驚;你太長進,佢仲驚。雖然其實以前晚晚都會同佢一齊睇書,佢又鐘意睇英文書,60本我又覺得佢會做到既。

:好呀!咁中文呢?宜家你放學返黎都幾晏,你又攰,不如上學期寫住20本先啦。

:唔好,上學期我照寫30本!

我個腦裹面忍唔住諗起呢個畫面:

中文書唔係佢至愛,佢點解忽然咁勇?

:咁你每個星期都要睇一本中文書呀,你做唔做到?

:OK呀!

:好啦,你話架。應承左老師架啦!

講真,呢個suppose係鼓勵性既計劃,段估你走左數老師都唔會罸你。不過我當然忍住左無講出口,呢啲時候正常阿爸款梗係仲要講多兩句:做人要守信用架咁啦。

如是者過左3星期..暫時既跑數成績:勉勉強強on track;不過要調節下中文書既程度同埋本書既厚度:唔係佢下下走去圖書館借啲四大名著返黎,真係有排都完唔到一本。

呢D應該都啱你睇

(二十) 暖心的親子習作 我曾經講過我好怕做親子習作,但凡事總有例外。 阿囡學校有一個科目,份份功課都要「親子」- 即...
(四) 邊個係「筋斗小子」? Photo credit: lihie jacob 有一晚對緊阿囡本家課冊果陣,阿囡同我講:爸爸,...
(六) Season 1 finale:兩默一測的一星期... 你無睇錯,真係season 1 finale。 阿囡間學校全年分開5個學期(佢地叫做學段),1...
(五) 係電子學習定係打機? 記得當日去優才2nd in既時候,老師問:你點睇電子學習? 我係唔抗拒電子學習既,大勢所趨嘛。...
(一) Walking dead之season 1 九月三日,阿囡終於開學返小一。 睇住著上校服既佢,並未有「終於大個囡啦」的感慨;畢竟佢間學校件...
(八) 校長:42日建立一個好習慣... 上次聽完資深家長既分享之後,今次輪到曹校長主講家長晚會。 校長呢一晚既講題叫做:「Think ...
(三) 英文默書之化功大法第一層... 老婆要出差,自己「獨守空房」相當忐忑,因為老婆就好似大家公司啲IT一樣:佢係度啲野好地地,佢一行開就...
(十三) 2018升小大小事回顧 2018年黎到尾聲,電視台都會黎個年度大事回顧,所以我亦唔例外。 2018既升小之路其實算係風...

Be First to Comment

發表回覆

你的電郵地址並不會被公開。 必要欄位標記為 *