Skip to content

[阿囡小一上學記] (十三) 2018升小大小事回顧

2018年黎到尾聲,電視台都會黎個年度大事回顧,所以我亦唔例外。

2018既升小之路其實算係風平浪靜,因為阿囡間學校早係2017年既10月左右已經取錄左阿囡;自己一直心儀呢間學校,所以無參加大抽奬,亦無再參與其他已報名既直私面試。對於有朋友或同學可能仲地獄又折返人間緊,自己同阿囡真係相當幸運。

要明白只要係子女既任何事上加上「第一次」或者「最後一次」呢個字眼,我地做家長既感動位就會蠢蠢欲動。到左7月,3年既幼稚園生活就咁結束,本年度其一大感動位要來了 – 阿囡第一次畢業

阿囡幼稚園畢業,佢本人可能感受並不強烈,但我同我老婆卻係十二萬分不捨。唔捨得當日既一舊飯,變成宜家既激心又貼心既少女;又唔捨得用心裁培同照顧阿囡既校長、老師同埋校工;更加唔捨得一班由K1什至PN已經開始認識、由細睇住咁多舊飯長大既同學家長。

阿囡既幼稚園畢業典禮更加將呢個感動推向高潮。睇到阿囡一班個個一身耀目服飾:男既醒目氣派、女既花技招展,係台上施展渾身解數將畢業表演既舞步發揮得淋灕盡緻,內心感到又激動、又喜悅、又驕傲。

高潮過後正式放暑假;大家都忙住去玩,可能覺得升左小學之後就「無好日子過」了。係暑假上左幾次學校既迎新日,感覺每次都鐘意學校多一些。

終於到左9月開學,阿囡小一上學記開始了。本年度另一大感動位又來了:阿囡第一次返小學

自己係係香港讀小學既,又覺得自己對阿囡間小學都有一定既了解,以為返小學既轉變並不如想像中大。但一開學就好似當年用個假BB公仔上左十堂育嬰班後,第一次抱住啱啱出世既阿囡既感覺 – 喂唔同架呢個識郁既….

我以為阿囡間學校唔算谷,佢會好多時間玩;但事實上每日阿囡由放學到上床訓覺之間都好怱忙

我以為要完全放手等阿囡自己攪掂晒學校既野;但事實上連學校社工都話佢地咁細,其實未必真係ready。

我以為阿囡幼稚園既根底唔錯上到小學唔駛點理;但事實上又出現過嘔血既溫習經歷

我以為最大既敵人係做功課 + 默書測驗;但事實上竟然係追睇書同埋處理啲工作紙

種種差異之間,唯一同我想像中吻合既,好彩係阿囡同我一樣咁鐘意間學校。


講左咁耐我既感受,咁阿囡呢?佢升左小學覺得點呢?

學校之前有一份功課問阿囡「今年我由幼稚園升上小學,我發現自己最大的改變是…?」。

阿囡個答案係:

覺得小學好多功課,但我都可以做到。

雖然自己覺得佢功課真係唔算多了,但始終比起幼稚園無左半日,每日做完功課已無暇再玩要即刻訓覺,佢有咁既感受實在無可厚非。

學校後來又有一份功課問阿囡佢返左兩個月學既大事回顧。當中一條題目問「在九月至十月,我最感謝家人的事」。

阿囡當時寫左:

多謝爸爸陪我做功課。

儘管無出現「第一次」、「最後一次」呢兩個keywords,睇到佢個答案既一刻,我真的被感動了。

當然,感動過後,我依然每天不停為佢打氣:「快啲啦」、「得未呀」…..


展望來年,希望阿囡越來越享受校園生活,有更多時間同空間玩下休息下;自己講「快啲啦」既次數越來越少,有更多既耐性同智慧包容、體諒阿囡呢個獨特既生果

2019年再會!

photo credit: KC Ma

呢D應該都啱你睇

(九) 尋找worksheet的故事 (鐘sir腔):係好耐好耐之前,人類發明左紙。 然後過左好多好多年,人類發明左工作紙。 ...
(二) 小學生都要跑數? 阿囡開學一個月左右,放學食完飯過後雖然有時仍然處於walking dead遊魂狀態;但平心而論,其實...
(十一) 中文課:句子小工房 平時一聽到工房呢兩個字,一定係同食有關 - 吐司工房、麵包工房、半熟工房、健康工房等等等等....而...
(四) 邊個係「筋斗小子」? Photo credit: lihie jacob 有一晚對緊阿囡本家課冊果陣,阿囡同我講:爸爸,...
(十二) 朗誦比賽的收穫 由細到大都唔係好鐘意朗誦,總覺得聽人朗誦果陣好有感情咁讀啲字出黎,就好似聽一個唔識唱歌既人唱K咁。 ...
(八) 校長:42日建立一個好習慣... 上次聽完資深家長既分享之後,今次輪到曹校長主講家長晚會。 校長呢一晚既講題叫做:「Think ...
(十五) 大考來了 有人話結婚係戀愛既墳墓,咁考試好可能係讀書既墳場:因為死多好多人架嘛。 係度問一個我相信所有學生都...
(六) Season 1 finale:兩默一測的一星期... 你無睇錯,真係season 1 finale。 阿囡間學校全年分開5個學期(佢地叫做學段),1...

Be First to Comment

發表回覆

你的電郵地址並不會被公開。 必要欄位標記為 *