Skip to content

[阿囡小一上學記] (十九) 找錯處

大家細個有無去機鋪玩過一個遊戲叫做Photo Hunt? 遊戲機畫面會出兩張圖,你要係限時內用手指篤第二張圖上既錯處,篤中晒就可以過關:

細個既時候去親機鋪都會同同學玩呢個遊戲,估唔到大個左之後,係晚晚都有得玩。

每晚坐底對阿囡功課既時候,就好似玩緊Photo Hunt一樣,總係會發現有大大小小既錯處。而同Photo Hunt一樣,呢個遊戲係有限時:因為阿囡又趕住要訓第二朝要一早起身。

阿囡其實通常都係衰係中文科手上,當中亦以寫錯別字為主。有時睇到佢寫錯字都幾好笑,例如呢張過年worksheet祝你大大利:

呢句亦順利成為今年農歷新年我同佢拜年既祝賀句之一。

中文字畢竟變化萬千,我地咁大個人都寫錯字啦,阿囡咁細寫錯字係在所難免。但有時個勞氣位就在於明明個字係上面你照抄都抄錯:

以上既錯處並非中文科專利。無論英文定數學,照抄都抄錯真係十常八九。希望佢大左唔好變copy and paste都paste錯我就ok了。

有時候佢又會忽然間錯得好無厘頭。問問下你形容詞忽然寫隻動物落去:

雖則平心而論,其實都算make sense既如果加個頓號係中間。

最經典莫過於呢一條數學題,令我諗起自己細個每逢過完新年,寫功課一定會寫錯年份:

阿囡仲有一招「無仇報」必殺技,就係寫錯家課冊 – 等你對都對唔到。阿囡不時將啲功課或者測默日期寫早或者寫遲,例如啱啱教左課書兩日就默書,或者2月既功課變左8月交。

當然,只要向神聖而偉大既家長Whatsapp group尋求真理,就會知道其實真正既家課冊寫左咩,然後大叫一聲:「哦」!

最近一次佢又寫錯左中文默書時間:

我:「點解你咁多字唔識既?」

囡:「因為啱啱先教囉。」

我:「啱啱教點解會聽日默呢?」

囡:「唔知呀。可能我寫錯……」

我:「咁你寫左就要信架啦,照溫啦。若你唔想下次咁你對清楚家課冊先放學囉。」

囡:「同學都有對我本家課冊架點解佢唔話我知我寫錯?」

我:「咁本家課冊係你定佢架?」

囡:「我既。」

我:「咁你既野咪你自己睇囉。佢係幫助你,唔係代替你嘛。佢會唔會同你做埋份功課考埋試丫?」

囡:「唔會。」

我:「咁咪係囉。」

然後死死地氣(我講我)繼續溫。

雖然阿囡係好多失魂野,但阿囡有一樣野好,就係每一次我同佢對功課發現錯處,基本上我成份俾返佢睇,我唔話佢錯邊佢自己會pick up返。

更厲害既係,佢唔只自動波咁改返好啲錯處,仲會自動波地幫我講埋我想講果句:「真係丫,有無check架」。

Be First to Comment

發表回覆

你的電郵地址並不會被公開。 必要欄位標記為 *