Skip to content

[阿囡小一上學記] (十五) 大考來了

有人話結婚係戀愛既墳墓,咁考試好可能係讀書既墳場:因為死多好多人架嘛。

係度問一個我相信所有學生都曾經諗過既問題:你想考左試先放大假定放完假先返黎考試?我係一個好典型情願先苦後甜既人:食飯唔鐘意食果啲野會食哂先,留返最鐘意既係最尾,所以我一直既答案都係:考左先。

一如以往,我走左去問阿囡同一個問題。

囡:「梗係鐘意考左試先放假啦。」

我:「點解呢?」

囡:「咁放假玩果時唔會成日掛住嘛。去旅行果陣我都成日會諗住返去要考試啦… 」

我:「嘩原來你去旅行果時都成日記得要考試架?」心諗:咁生性既。

囡:「晤…  記得一兩次度啦… 」把聲開始變細…

一放完聖誕假,終於黎到阿囡間學校既第一次總結性評估。越來越多學校用「評估」呢個字眼取代聽落好似較負面既「考試」,不過我相信家長們唔會因為改左呢個字眼而感覺輕鬆。試諗下年尾你老細無論係同你係「表現評估」定係「年度回顧」,你都係擔心佢加唔加你人工架啫。

阿囡間學校小一只係考中英數三科,一星期內考完,每科都隔左一日俾你溫習。同阿囡講今次溫習既目標,唔止係點溫熟啲野,而係希望佢開始要有點plan自己啲時間既概念。畢竟陪太子讀書… 真係好悶。況且宜家啲野咁深,自己又有能力幫得幾耐?

所以第一件溫習同佢做既事,就係拎晒啲範圍出黎,然後拎左學校之前送既一本schedule book,同佢係上面一齊mark究竟佢邊日會溫啲咩。大約同佢一齊訂好溫習時間表之後,另一件苦差就係執返佢要溫既工作紙。有追開呢個故仔就知道呢個過程既艱辛,大家亦好清楚個結果:同你約返啲舊同學食飯既出席人數一樣,永遠都係唔齊。

準備就緒了,首先同阿囡開始溫中文。中文科包括中文同普通話,我地決定先溫習普通話。對住普通話既工作紙叫阿囡逐個字讀啲拼音比我聽,阿囡讀左一兩張,開始有少少唔耐煩。

囡:「爸爸,考試係老師讀個字,我地連返條線去啲圖畫架。」

我:「咁你唔識讀個字,你點連到去個啱既圖畫呀?」

囡:「考試果陣只係有幾個拼音同埋圖畫比我地配對,所以我地到時係揀唔係講架。」

我:「咁你如果係街撞到個人同你講普通話,你會比張圖佢連線定同佢講普通話?」

囡:「講普通話囉。」

然後,我講左我覺得係阿囡出世以來我講得最有教育意義既一句說話。

我:「你學既野係拎黎用,唔係拎黎連線同考試架;比你連啱晒啲線但原來你係唔識用普通話咁學黎做乜?」

阿囡望住我諗左一下,可能呢個阿爸好耐無講啲咁發人深省既說話,令佢不由得有少少噩然。然後好快,佢就再逐個字讀啲拼音比我聽,無再講其他野。

經過一番努力,同阿囡讀左一次啲字,咁就溫完左普通話。

正想話不如玩陣先啦(我好悶呀呀呀呀呀),老婆問:「佢溫完普通話嗱?」

我:「係呀!同佢睇左一次啲生字同拼音架喇。」

老婆:「咁你點知佢已經識喇?」

我:「晤…都係同佢連下線睇下啱唔啱咁啦…」把聲開始變細…

Photo credit: Pixabay

呢D應該都啱你睇

(五) 係電子學習定係打機? 記得當日去優才2nd in既時候,老師問:你點睇電子學習? 我係唔抗拒電子學習既,大勢所趨嘛。...
(十一) 中文課:句子小工房 平時一聽到工房呢兩個字,一定係同食有關 - 吐司工房、麵包工房、半熟工房、健康工房等等等等....而...
(八) 校長:42日建立一個好習慣... 上次聽完資深家長既分享之後,今次輪到曹校長主講家長晚會。 校長呢一晚既講題叫做:「Think ...
(七) 家長分享:生果論 話咁快就一個學段結束;覺得自己仍然係未適應到「阿囡返左成個學段仲適應緊」既事實。學校咁啱攪左一個家長...
(十四) 視藝科參觀之「動物大觀園」... 學校既視藝科被稱為綜藝坊,功課政策同學校本身一樣自由,同學一個學期內做四份題材不限既作品就可以了,例...
(十二) 朗誦比賽的收穫 由細到大都唔係好鐘意朗誦,總覺得聽人朗誦果陣好有感情咁讀啲字出黎,就好似聽一個唔識唱歌既人唱K咁。 ...
(十) 社會課:叮噹同你共建社區樂滿FUN... 當初睇通告見到「共建社區樂滿FUN」既時侯,以為係某電視台既節目,類似歡樂滿東華啲friend。 ...
(二) 小學生都要跑數? 阿囡開學一個月左右,放學食完飯過後雖然有時仍然處於walking dead遊魂狀態;但平心而論,其實...

Be First to Comment

發表回覆

你的電郵地址並不會被公開。 必要欄位標記為 *