Skip to content

[阿囡小一上學記] (十八) 家長日

記得細個既時侯每逢到家長日,自己都會諗:唔知今次老師會話我衰咩呢。時至今日到自己作為家長參加家長日,角色轉變左,但諗既野其實差唔多:唔知老師會話佢衰咩呢。

有時候覺得見家長有少少似performance review,雖然唔係講緊你個performance ,但多少有見老闆果時果種緊張感:又期待有讚賞,又害怕有負評。

帶住呢少少緊張感黎到學校行入阿囡班房;當初以為淨係得班主任係入面,原來班房內仲放左兩排凳俾未見既家長入埋去等。可能係怕某啲家長傾到唔肯走,俾少少壓力大家等啲時間keep得好啲。咁如果我想講第二個同學事非咪會有機俾後面個家長聽到?

終於輪到我地見班主任了。之前其實係唔同既學校活動都有見過阿囡班主任;班主任非常友善親切,今次再見佢都係滿面笑容,令我稍稍忘記左腦入面果句「佢今次衰咩」。

班主任第一時間先交左阿囡既成績表俾我地睇。其實之前考完試學校派返唔同科既卷返黎,我同老婆都已大約知佢考成點(同埋衰咩),所以對成績表上既分數並不意外。

另一個都無乜意外既係老師既評語:同以往阿囡幼稚園時啲老師既評語差不多。老師評語既最後一句話希望阿囡繼續努力,唔好辜負老師既期望。好想問下班主任:你對佢既期望包唔包括管理好啲工作紙架

睇完成績表,班主任好快就同我地進入答問環節。我同老婆其實比較關心阿囡既適應同埋同同學間既相處,所以同班主任傾既內容都係圍繞住呢個主題。班主任非常留心聽我同老婆講既問題同意見;佢話家長日係好好既機會俾佢聆聽晒咁多家長既聲音,等佢可以綜合下全班同學同家長既睇法後係下學期幫到班小朋友。

咁講法,班主任咪即係要將至少三十幾人(甚至Double…若兩個家長一齊黎)既口供分析然後綜合一個full picture 出黎?「刑事偵緝檔案」一個case都係最多有兩三個人錄口供啫,三十幾人…點攪?

講下講下話咁快已經夠鐘,後面既家長亦已經到左。雖然好想同班主任繼續傾,不過都要離開等班主任接見下一位家長。好快係心入面計數:見一個家長15分鐘,我地成班三十幾人佢咪要見8個鐘?再一次感覺老師唔易做…

返到屋企,未俾成績表阿囡睇之前我叫佢估下佢張成績表係點。

囡:「我估宗教考得麻麻地。」

我:「點解呀?」

囡:「因為我成日都唔記得啲金句。」

爭啲想同佢講:咁咪睇多啲黎明或者方東昇囉,好多金句架。

從我呢個阿爸既角度,總結第一學期,其實阿囡已經achieve左好多野:開學初既walking dead已經慢慢消失,宜家做野快手左,算係upgrade左做running dead;開學初訂既睇書target最後亦都meet到。無論佢考試考成點,突破到自己其實已經非常可貴。

所以我同老婆最終送左一份禮物俾佢,鼓勵同肯定佢呢一個學期既努力,同時希望為佢黎緊既下學期打打氣。阿囡小一既上半部,亦係佢收到禮物時既燦爛笑容下完滿結束。

呢D應該都啱你睇

(四) 邊個係「筋斗小子」? Photo credit: lihie jacob 有一晚對緊阿囡本家課冊果陣,阿囡同我講:爸爸,...
(十五) 大考來了 有人話結婚係戀愛既墳墓,咁考試好可能係讀書既墳場:因為死多好多人架嘛。 係度問一個我相信所有學生都...
(三) 英文默書之化功大法第一層... 老婆要出差,自己「獨守空房」相當忐忑,因為老婆就好似大家公司啲IT一樣:佢係度啲野好地地,佢一行開就...
(十九) 找錯處 大家細個有無去機鋪玩過一個遊戲叫做Photo Hunt? 遊戲機畫面會出兩張圖,你要係限時內用手指...
(十六) 英文考試的溫馨提示 阿囡間學校放完聖誕假就大考,考完中文科之後就輪到英文科。 一如上次溫習中文科,同阿囡拎左範圍...
(十二) 朗誦比賽的收穫 由細到大都唔係好鐘意朗誦,總覺得聽人朗誦果陣好有感情咁讀啲字出黎,就好似聽一個唔識唱歌既人唱K咁。 ...
(十一) 中文課:句子小工房 平時一聽到工房呢兩個字,一定係同食有關 - 吐司工房、麵包工房、半熟工房、健康工房等等等等....而...
(五) 係電子學習定係打機? 記得當日去優才2nd in既時候,老師問:你點睇電子學習? 我係唔抗拒電子學習既,大勢所趨嘛。...

Be First to Comment

發表回覆

你的電郵地址並不會被公開。 必要欄位標記為 *