Skip to content

[阿囡小一上學記] (十) 社會課:叮噹同你共建社區樂滿FUN

當初睇通告見到「共建社區樂滿FUN」既時侯,以為係某電視台既節目,類似歡樂滿東華啲friend。

原來,呢個係阿囡間學校既一堂社會課。

社會科係阿囡間學校堪稱神科,記得開學時家長晚會,當社會科老師上台介紹時,二年級既家長係會係台下歡呼,好似睇緊華仔咁。更厲害既係當數學科統計「我最喜愛的科目」時,阿囡果班大部分都選擇社會科。

學校攪左一個觀課日, 其中包括小一社會科。抱住一股好奇,返左學校參加左呢場觀課。

呢一堂社會課其實想教啲小朋友社區應有既設施,管理社區既人以及要愛護社區既道理。不過教你果個唔係老師,係叮噹。

老師打開PowerPoint ,畫面上出現叮噹同大雄兩個卡通人物,課堂就由故事開始。故事係講大雄(社會老師聲演)、叮噹(另一老師聲演)同埋叮噹啲friend如牙擦仔(由聲演叮噹既老師分飾)係一片荒地度建設一個社區;同學要係不同環節參與其中,幫叮噹同班朋友仔順利建立同維繫呢個社區。

例如其中一part講牙擦仔亂咁搵啲人去管理社區設施,好似叫個醫生去救火,攪到變左成隻燒豬咁出返黎 (個老師真係係個PowerPoint度整左個animation將個醫生公仔變左做燒豬公仔)。老師於是就叫小朋友分組,每組派左一啲社區設施同埋唔同職業既圖片比同學做配對,幫牙擦仔搵返啱既人管理返啱既社區設施。

每組完成之後老師又會問返同學點解會配呢個職業去呢個設施,同埋呢個職業需要用啲咩「架山」黎揾食。例如警察要用槍同手扣,消房員要用水喉。見到成班同學好肯舉手答野,老師亦盡力令每一個同學都有機會答問題,人人有份。

睇得出老師用左好多心機同時間去準備呢節課。首先為左教呢一堂老師特登創作一個叮噹既故仔,然後要花時間做一大堆製作,例如整PowerPoint(仲要係有動畫),扮聲(仲係一人分飾幾角),整分組學習時既道具等等。個故仔又要非常互動,中間又要鋪排下啲戲劇性既笑位比小朋友(例如係個故仔度技安亂拋垃圾變左垃圾蟲,啲小朋友都笑左一輪)。

我諗到唯一一個職業係要咁樣做野既,應該只有導演。又要度故仔又要做製作,仲要自己演埋一份。當然,主要分別係老師唔駛擔心個票房,因為…基本上一定有觀眾入場嘛。

上完呢節課,終於明白點解啲小朋友咁鐘意社會堂 – 原來成班唔係去左歡樂滿東華,而係好似去左「奬門人」;對老師既用心同創意又感激又佩服。下次見到啲老師,或者唔係問佢下堂教乜,而係問下佢:下部諗住開咩戲呀?

呢D應該都啱你睇

(十三) 2018升小大小事回顧 2018年黎到尾聲,電視台都會黎個年度大事回顧,所以我亦唔例外。 2018既升小之路其實算係風...
(十一) 中文課:句子小工房 平時一聽到工房呢兩個字,一定係同食有關 - 吐司工房、麵包工房、半熟工房、健康工房等等等等....而...
(六) Season 1 finale:兩默一測的一星期... 你無睇錯,真係season 1 finale。 阿囡間學校全年分開5個學期(佢地叫做學段),1...
(十二) 朗誦比賽的收穫 由細到大都唔係好鐘意朗誦,總覺得聽人朗誦果陣好有感情咁讀啲字出黎,就好似聽一個唔識唱歌既人唱K咁。 ...
(十五) 大考來了 有人話結婚係戀愛既墳墓,咁考試好可能係讀書既墳場:因為死多好多人架嘛。 係度問一個我相信所有學生都...
(三) 英文默書之化功大法第一層... 老婆要出差,自己「獨守空房」相當忐忑,因為老婆就好似大家公司啲IT一樣:佢係度啲野好地地,佢一行開就...
(四) 邊個係「筋斗小子」? Photo credit: lihie jacob 有一晚對緊阿囡本家課冊果陣,阿囡同我講:爸爸,...
(七) 家長分享:生果論 話咁快就一個學段結束;覺得自己仍然係未適應到「阿囡返左成個學段仲適應緊」既事實。學校咁啱攪左一個家長...

Be First to Comment

發表回覆

你的電郵地址並不會被公開。 必要欄位標記為 *