Skip to content

[阿囡小二上學記] (一) 運動會之有驚無險親子跑

上年寫阿囡小一上學記果陣我都講過,我好怕做親子習作。不過,都比唔上親子運動會咁令我驚慌。

事緣係阿囡再細啲果陣,我地同阿囡報左一個出面機構攪既「親子接力賽」。以為只係一個玩下既親子活動,結果我比賽果陣跑到飛左隻鞋出黎再狠狠地仆親,攪到要去醫院聯左幾針。

呢件事唔單止成為我既陰影,更加成為阿囡既陰影,因為佢見証住我點仆嘛。所以當學校出通告話今年運動會有親子接力賽,我其實好唔想參加。

走去問阿囡玩唔玩,佢竟然好爽快話佢想玩,仲同我講:「我要你再參加」。心諗:「點解唔叫你阿媽去呀,你阿媽行路快過我跑步……」

結果係阿囡堅持之下,我極餚底地報名參加左今年真道運動會既親子接力。

到左阿囡運動會當日,原本仲驚會落雨,點知天氣好到不得了。我去到運動場坐係家長席,見到每一班都好落力咁幫同學打氣,好有氣氛,忽然好老土地覺得「啲青春返晒黎」。

學校規定2年級同學一定要參加60米賽跑,所以阿囡第一項比賽就係60米。走落跑道附近見阿囡準備起跑果陣非常集中,同平時做功課真係判若兩人。或者我以後叫佢做功課時應該講「on your mark」,可能佢會專心啲。

槍聲一響,阿囡唔係第一個衝出黎,但見佢慢慢追返上黎,跑姿一路都好「firm」無走樣,越來越有力(好似講馬咁),唔似以前咁「姐手姐腳」。最終,阿囡出乎我意料地小組第一名返終點。

好好奇到底佢食左啲咩呢?點解勁左咁多既?駛唔駛驗尿?

終於到左親子接力環節,司令台召集所有參賽既親子。落到召集處見到有啲爸爸成個消防員咁既body,忽然為自己文員般既body感到擔憂。

不過最擔憂既,其實係阿囡。

囡:「你準備好未呀?」

我:「OK啦。」

囡:「對鞋實唔實架?」

我:「好實架。」

囡:「小心啲唔好再跌啦。」

阿囡講野既語氣同內容,令我差啲以為係我老婆黎左。

準備開跑了,一眾阿爸行到去跑道前一半等小朋友跑過黎交棒。講真心情相當複雜:以前阿囡跑得慢,講真輸左都無法子。不過佢快左咁多,若果輸左咪係我陀衰家?

比賽開始,阿囡同另一個同學叮噹馬頭,話咁快已經近在眼前。腦裏面開始諗:「嘩真係有機會陀衰家?」「會唔會又仆親架?」

我估計我應該係第一或者第二個人接到棒,不過我一開步就發現有兩個爸爸已經幾個箭步飛左係我前面。去到呢個時候已經再唔得閒諗野,只係好努力咁郁果兩隻平時無乜點用既腳。

兩三下已經去到終點,最終我應該係第三個完成。個腦又得閒返,又開始諗:唉真係浪費左阿囡開段跑得咁好。但係至少好彩無仆親。

回頭想去睇下阿囡點,點知已經唔見左佢既蹤影。再行近佢班既看台,見佢已經返回崗位,好興奮咁為同學打氣了。或者呢一場勝負,係我比佢看得更重吧。

夜晚返到屋企,忍唔住都讚下阿囡今日既表現。問阿囡點解快左咁多既?兩父女既結論係:因為弟弟成日自己一支箭走左去,家姐成日走去追佢,久而久之鍛練出好身手。

咁講法…如果下次運動會弟弟係佢前面好似電兔咁跑先等佢去追,佢咪有機會攞第一?

Be First to Comment

發表回覆

你的電郵地址並不會被公開。 必要欄位標記為 *