[阿囡小二上學記] (三) 補充練習的誘惑

  •  
  •  
  •  
  •  
  •  

大家有無係生小朋友之前,曾經諗過又或者同你伴侶討論過一啲育兒既原則?

例如話:如果我第時有小朋友,我一定唔會比佢玩手機。又或者係:如果我第時有小朋友,我一定會要佢學一種樂器。

廣告
Loading...

大家又有無諗返,我地以前諗既呢啲原則,我地做左人父母後仲係咪會keep到?

我記得我以前曾經同自己講:如果我有小朋友,我會求其比佢讀樓下果間學校就算。Exactly樓下果間,遠一個街口都唔去。但結果我走左去同佢排長龍考PN班,之後考小學仲去埋考直資私校(宜家仲寫埋個blog…)。

最近,我又打破左另一個我曾經諗過既一個原則:如果我有小朋友,我唔會買補充練習俾佢做。

我曾經覺得要額外去買補充練習俾小朋友做係一種chur佢既表現。「平時有做功課,上堂有聽書咪得囉,唔駛再特別做啦」、「再俾佢做多啲佢咪盞越做越唔鐘意越做越差」,我隨便都可以諗到幾個唔買補充練習既理由。

阿囡小一果陣同佢溫書,我多數拎佢做過果啲功課求其拎第2張紙寫少少example俾佢做就收工。如果有啲工作紙可以遮到,有時拎啲野遮住答案叫佢答落另一張紙度就算。

雖然呢個過程都幾花時間,不過阿囡又唔算多野考;問過佢幾條ok就算了。而且小一都係得中、英、數;中、英叫佢默下啲字,數學寫啲加減數俾佢計下,都叫做managable,所以一直我都堅守我「我唔會買補充練習俾佢做」既原則。

不過最近我終於投降了。

二年級同阿囡溫習,發覺內容多左。要verify佢到底識唔識,要take既effort相對大得多。例如數學咁,以前就寫幾條直式,宜家又問方向、重量、角度,唔通真係走去手畫啲唔同既圖俾佢練習?畫都畫死我啦。最慘畫完佢都唔知我係度畫乜 (無乜畫畫天份)。

廣告
Loading...

偏偏佢啲工作紙、功課又本本都寫晒野,好難遮住問佢;自己呢輪又好多野做,要花時間去攪啲sample陪佢做,坦白講覺得太吃力太花時間。最好就係比份野佢做,做完睇下佢有乜唔識再教就最省時省力。如果有現成既話……

於是,係我見到阿囡聲稱佢已經睇晒啲課文,然後灘左係梳化同梳化融為一體果一剎那,我終於忍唔住衝左落街度搵補充練習。

去到書局果陣,仍然有少少心大心細,不停咁問自己:「駛唔駛呀」。我有一刻覺得自己好似第一次去買鹹書咁,不知所措。不過亦好似第一次去買鹹書既人一樣,當你打開第一本書睇過之後,你既困惑將一掃而空。

嘩,正呀。

雖然都花左少少時間比較幾本唔同既練習:畢竟我估無一間學校會同出版社夾得咁啱。但雖不中,亦不遠,好快都揀到一本啱用,仲要唔駛$40蚊。於是即刻走去counter俾錢,同時感受到第一次成功買到鹹書既喜悅(都係估下架咋… 我又未真係買過鹹書… )。

返到屋企,同梳化(已經分唔到佢係我個囡定變成梳化)講:起身啦,同我做一做啲練習睇下你識唔識。

結果阿囡終於叫做集中返少少精神做我俾佢既練習;佢每做完我就睇下佢有邊啲錯左,然後解釋返就好了。係唔同既練習入面發現阿囡既大意又出返晒黎,亦有發現佢某啲concept唔清楚,還好透過呢啲補充練習有所發現可以同佢補補飛。

不過講真,我諗呢本補充練習最大既作用,其實主要係營造左一個「佢坐定定溫緊書」既畫面俾我。同我係公司扮做野俾老細睇可能係無乜分別。

我其實仲有一個原則:「如果我有小朋友,我唔會要佢補習」。

唔知到幾時呢個原則會俾我打破埋呢……

廣告
Loading...


  •  
  •  
  •  
  •  
  •  

2 Comments

  1. 我個子三年級就打破了“吾上補習班”的原則了, 補習了英語,但是沒補習語文, 結果五年級語文就學得好辛苦,現在都後悔了,因為啟發學習寫作文的最好時期是1-4年級。花錢買好方法買效率,值得花。

    • 咁我又無後有/無買補充野或者無俾佢補習既,真係怕俾佢成日對住佢盞無心機…

      你講既語文即係中文?

Leave a Reply

想睇到最新內容?

歡迎讚好「好校爸」Facebook專頁!