Skip to content

[阿囡小二上學記] (四) 困獸鬥

武漢肺炎襲港,年假後學校停課;再加上疫情嚴峻又唔夠口罩 ,自己都唔敢出街,更何況係小朋友。於是兩隻野日日係屋企,再加埋喱係屋企返工既我,形成大家俗稱既「困獸鬥」。

「困獸鬥」既攞命之處,在於個「困」字。講真,日日困你係一個地方,係人都變做獸啦。今次加埋呢個武漢肺炎更加係攞你命三千,因為連帶佢地落個街都唔係好敢,所以真係7 x 24咁困住左佢地同我。

但呢個「困獸鬥」對我最攞命既地方,係在於我唔止一隻,而係有兩隻獸。「困獸’s’鬥」呀即係。所以你估會點?梗係開片啦,唔通佢兩個會坐定定傾計分享被困感受咩….

所以每一日,基本上我同我老婆同下面個拳証係無乜分別:

全程望住佢兩隻野,一見佢地埋身就要分開佢地。

而最慘果下係:我屋企細到同個擂台一樣,基本上係無乜位分開佢兩個。

不過好彩我讀得書多。記得細個果時我睇過一本叫做「金田一少年事件簿」既書(唔知係乜 ?所以話人係一定要讀多啲書……),入面有一個殺人事件係講個兇手點樣利用時間表,將兩個明明係同一個地方既人既活動完全錯開,等佢地以為自己係兩個唔同既地方,幫自己製造不在場証明然後巧妙咁將佢地殺害(bonus: 有無人記得係邊個殺人事件)。

老婆亦有見兩個生活秩序大亂又成日係度hea,幫佢地製作左時間表,等佢地唔會成日坐係度唔知做乜好。於是我地就利用呢個時間差同埋僅有既一間房,盡量將佢地一齊既時間減少50%。效果暫時令人滿意:我同老婆尖叫既時間亦相應減少左50%。

不過又講返轉頭,佢兩個被困家中咁耐,但一句都無扭過計話要出去玩,都已經好乖了。然後一諗到自己唔駛出去返工撲口罩,又驚出完去返黎帶左病毒傳染佢地,其實已經好幸福。

係度希望大家,尤其係醫護人員個個身體健康,成功抗疫。

辛苦你地了。

Be First to Comment

發表回覆

你的電郵地址並不會被公開。 必要欄位標記為 *