音小簡介會2017

  •  
  •  
  •  
  •  
  •  

音小(全名國際基督教優質音樂中學暨小學)每年都係打響直私小學面試頭炮既學校;無論簡介會、面試到出offer佢地都係第一個。由於阿囡鐘意音樂,所以亳不猶豫報左名去聽佢地既簡介會。

簡介會係一個星期五既晚上舉行。放工去到學校已經好多人排緊隊,心諗:「龍年的競爭又開始了」。簡介會係以勒音樂廳度進行,由於我都有少少遲,所以入到去已經要坐山頂。簡介會正式開始,一開始有2個學生出黎講見証,然後一班學生出黎唱左2首詩歌,唱左都差唔多成十幾分鐘,連陳校長出黎致辭都講笑話「澄清今晚其實唔係音樂會,不過係有音樂節目姐」。陳校長跟住開始介紹學校既理念同埋起源,重點有:

廣告
Loading...

音小學制

12年一條龍學制分三個階段:junior (grade 1 – 4); middle (grade 5 – 8); senior (grade 9 – 12);每個階段按小朋友需要施教。

  • Junior: 第一階段restore – 令學生恢復同神既關係,能夠擁有仁愛、喜樂和平既心。學校深信基督既教誨能夠重燃學生對學習既興趣同盼望,同時幫助家長同學生建立有愛既家庭
  • Middle: 第二階段return – 轉化學生既生命,令佢地成為有信心、愛心同夢想既人。呢段時間亦正值青春期,學校會幫學生跨越升中、異性種種迷惑同試探
  • Senior: 第三階段revive – 幫助學生成為發熱發光既新世代。呢個階段學生將接受公開考試,面臨升學就業等問題;老師會成為學生既」牧者」,發掘學生既優點,同佢一齊實現夢想

優質音樂教育

話明係音樂學校,除左好多基督教既內容外課程有好多元素都係以音樂黎貫穿。

學校會有系統咁教學生音樂,每星期4個音樂課,包括樂器演奏,音樂創作,音樂欣賞同埋合唱訓練。除左學生可以選修好多樣唔同既樂器,學校亦會教學生認識同欣賞古典音樂,認識音樂家既歌曲同時代背景。

廣告
Loading...

校長話係音樂中可以學多好野 -例如學音樂家,你可以學埋歷史,點解果個時代會寫果隻歌。

音小學習環境

除左一個靚既校園,學校以下面4方面去總結音小既學習環境:

  • 語文:唔止上課學語文;會以更生動既方法學好語文,例如歌唱,什至音樂劇。小一至小四多以母語為教學語言,到左中學就多數講英文
  • 音樂:成個校園你都會聽到音樂:早晨既時候播音樂等你以為去左旅行;放學播黃昏音樂令D學生feel到好relax;考試播莫扎持鋼琴曲幫大家醒醒腦。連派成績表都會播d有鼓勵性既音樂,等學生積極面對
  • 高尚品格:著重學生忠心學習既態度,重態度多於成績。校長話學習唔係一條死線,每個係音小讀既小朋友都可以因為努力而比人讚,唔會淨係所謂叻既學生先會
  • 創意:除左學欣賞音樂,更加鼓勵學生創作音樂。學生可以自己作歌作詞,整完首歌仲可以出CD比你買

音小其他特色

  • 雙主任制,三十五個學生一班
  • 行師徒制,每位老師好似耶蘇帶住十二門徒咁
  • 評估:無排名次
  • 校服:校長話校服最有taste,仲入選過全港最佳校服之一
  • 校巴:校長好有信心梗有一架係你住既左近

後記

校長講完晒野以上既簡介之後就輪到約15分鐘左右既音小簡介會問答環節

雖然好多人當音小係水泡或者面試熱身,不過自己聽完同睇完其實幾鐘意間學校,所以最終都有幫阿囡報左名參加音小面試

廣告
Loading...


  •  
  •  
  •  
  •  
  •  

2 Comments

  1. […] 音小簡介會比想像中有趣:陳校長其實意想不到地風趣。下面節錄左簡介會既問答環節比大家參考下: […]

  2. […] 聽完音小簡介會,覺得陳校長都幾有heart; 學校環境亦唔錯,加上阿囡又鐘意音樂,所以報左名同佢參加音小面試。 […]

Leave a Reply

想睇到最新內容?

歡迎讚好「好校爸」Facebook專頁!