[升小故事] 地獄折返人間記 (五)

由CC媽係大抽奬抽到廿幾志願到後來考到「111」 叩門學位重返人間,我都以為呢個升小故事會就咁大團圓結局。不過估唔到,原來仲有另一個峰迴路轉既發展。

CC媽考到「111」藍田德田李兆強既學位後,好快手買齊晒書簿校服,然後跟手俾埋校巴錢。CC媽什至有帶阿囡去學校度認識間學校,希望阿囡更熟悉,更喜歡呢間幾經波折先入到既學校。

CC的確係開始鐘意間學校。CC媽話佢拎左校服返去既時候,阿囡著住唔捨得除,什至想著埋出街;係影樓拍畢業照,阿囡都話要著住套小學新校服黎影。

正當CC媽同CC一家準備好晒所有野等開學既時候,8月25日,一個電話將所有野改變。

記得我係第一回既時候講過,CC媽考左8間直資私小,其中一間最心儀既直資in到final round waiting?就係呢一日,呢一間直資學校打比CC媽同佢講:「我地有位了,你個囡黎唔黎讀?」

CC媽話佢果一刻既心情真係難以形容。係開心,又有驚喜,但又同時極之忐忑。

之前都講過,CC媽一向知道藍田德田李兆強學術環境好好,又多課外活動;學校亦相對較近自己同家人既屋企。再加上自己同阿囡都算幾經艱辛先得到呢個位,又已經準備好晒所有開學既物品,唔容易說服自己再作出改變。

不過,呢一個offer亦同時喚醒左CC媽對呢間「111」校一直埋藏心底既一個想法。

CC媽之所以當日聽完簡介會後認為自己同阿囡未必適合間學校,係因為CC媽覺得校長係簡介會上俾佢既感覺係學校較重視成績同埋學校既形象,但CC媽其實並不最看重呢兩樣野。

CC媽其實最想要既一間教法比較靈活,著重訓練小朋友思辨既學校。成績對CC媽黎講係其次,佢更希望活潑好動既CC可以成為一個好學既人,係一個重視創新同埋品德培育既環境下成長。CC媽覺得呢間直資小學正正滿足佢既條件。

當日in完呢間直資收到waiting,CC媽同老公真係好失望;實在無諗過竟然係臨開學最最最後一刻,會「海底撈月」地獲得呢間學校既offer。

最終,CC媽同老公都係決定忍痛放棄得來不易既「111」學位,選擇入讀呢間直資學校。

CC本來已經好期待係「111校」開學,開頭聽到呢個咁突然既安排唔係太願意。但宜家開左學幾個月,CC每一日都好開心咁返學同好鐘意間學校,CC媽知道自己當初既決定無錯。

CC媽呢一個升小故事,終於告一段落。

最後,我問CC媽經歷左呢一個奇妙升小之旅,有無野想同大家分享。

借一句:「當上帝關了一扇窗,必打開另一扇窗」。想鼓勵大家未到開學,什至就算開埋學,都仲有機會!

CC媽呢句說話對升小尤其貼切:當有人放左個位,必打開另一個位。

希望大家都好似CC媽同CC一樣,排除萬難,最終能夠得到一個適合小朋友既「歸宿」!

(升小故事 – 地獄折返人間記完)

Photo credit: Pixabay

3 Comments

    • 如果唔介意講我都想知~一條龍?
      因為德兆真係好多人都想入都入唔到, 又近屋企, 又免費
      但谷到痴線又真係唔係人人想行依條路

      不過想講既, CC真係叻, 咁多間都有2ND仲考到直資又考到德兆

      • 因為應承左CC媽不會透露,所以就唔開估了。佢都有咁講過,德兆已經好心儀,但始終怕佢谷,所以最終都係選擇左間直資囉。

        的確,認識呢位小朋友好醒目!

發佈回覆給「好校爸」的留言Cancel Reply

發佈留言必須填寫的電子郵件地址不會公開。 必填欄位標示為 *

想睇到最新內容?

歡迎讚好「好校爸」Facebook專頁!