[姐弟海外升學記] (一) 「好地地,做乜郁呢?」

呢一世仔其實從來都無諗過會係香港以外既地方生活。

我係一個普通香港家庭長大,普通咁讀書,普通咁升學,普通咁出黎做野,仲要係做得極普通添。我既世界觀,除左睇世界盃果陣,從來最遠都只係去到日本左右。所以莫講話去住,我連旅行去遠啲都無乜諗過。

不過,係我好普通咁做野果陣,識左一個對我黎講好唔普通既人。然後好似無線啲劇咁,過左X年之後,我同呢個人 – 即係我老婆結左婚。

老婆其實係係海外回流返黎做野既。我知道終有一日我地會有機會去外國生活,不過每一次老婆講到移民呢個問題,我個答案同啲女朋友問男朋友幾時結婚差唔多:「兩、三年後啦」。

點解?因為我所有野都係呢度囉。我既家人、朋友、事業 – 我既過去同埋我既comfort zone全部係哂度喎。

「好好地,做乜郁呢? 」

然後,到左2019年。

忽然間,唔知係好彩定唔好彩,我一直以為唔會變化既comfort zone慢慢改變,越來越唔comfortable。除左我個人既際遇,相信大家同我一樣,同時經歷緊香港更大既轉變。香港從來都未試過波動得咁勁 – 唔係講個股巿,係講我地每一個香港人個心。

我無法再講得出「好地地,做乜郁呢?」。

或者人就係咁,你梗係週身唔舒服果時,你先會諗一啲你以前無諗過既野,你先會願意改變。所以當移民呢一個選擇再一次出現係我面前,我終於由「做乜郁呢」到問自己「做乜唔郁呢?」。

好老實講,無人會知移左民係咪一定會有好既結果。對於我呢個成世人都無離開過香港生活既人,大概日日都係問題吧。

呢個時侯,我諗起我其中一個最鐘意既漫畫角色泰來 (足球小將) 既一個故事。

話說泰來係日本讀小學,踢波好勁,同故事中既主角戴志偉合作出神入化。

不過,係佢拎左全日本冠軍、達到所謂高峰之時,佢移左民。

事隔三年後,日本想組織一支少年國家隊,結果越洋搵返佢。佢好無信心,唔知應唔應該參加,因為離開左好耐,佢覺得自己唔再係以前既自己。

結果,佢選擇左接受呢個挑戰,同時講左呢句說話:

「做了而後悔,總比不做而後悔好」

麥泰來 (足球小將)

我袋住呢一句說話,踏出我呢世仔都從無想像會踏出既一步。

3 Comments

  1. 機會,唔係人人都有!
    唔好做啲令自己後悔嘅事就無悔了!
    努力?向前!
    不過記得繼續更新網頁呀,走唔到嘅我都會繼續支持你架

    • 明白!的確機會唔係人人有,知道自己真係好好彩。多謝你既支持,我一定會繼續更新 (宜家多左時間…:P)。係香港保重呀!

  2. 心不隨境轉,行自己最想行、認為舒適的路,而唔係世界改變,你就要轉變。

Leave a Reply

發佈留言必須填寫的電子郵件地址不會公開。 必填欄位標示為 *

想睇到最新內容?

歡迎讚好「好校爸」Facebook專頁!