我地一開始打算移民果陣,原本都諗住用最傳統既方法,一炮過咁將所有物資放哂入箱然後成個貨櫃咁寄去外國。
老婆問過唔同既搬運公司,搬二十五個大紙箱過加拿大,盛惠18000蚊港紙。你可能覺得呢個未必係一個大數目,不過老婆問左一個問題:
「乜我地有咁多野要寄走咩?」
於是,老婆就開始左我地既漸進式moving plan。
Step 1:Inventory List
老婆第一件事就係用Excel整左個Inventory List,並且將我地既物資用以下方法分類:
- 唔要既野
- 可以送俾親友既
- 可以送俾有需要既人或recycle既
- 要既野
- 可以提早寄去加拿大既
- 要跟身同我地一齊去加拿大既
呢個inventory list老婆會不斷更新,每日佢會係屋企唔同地方度檢閱我地既物品,然後update呢個list。
Step 2: 送走唔要既野
第二步老婆就開始將「唔要既野」送出去俾人。
老婆既物件捨棄theory係:如果冇用過或者少用既,即係我地發揮唔到件野既作用,就應該送出。所以佢同兩個小朋友講:「好似Toy Story果啲玩具咁,你收埋又唔玩佢地,佢哋仲唔開心㗎。不如送比有需要嘅人,咁收到既人同啲玩具都會好開心囉。」
每次老婆執完啲玩具諗住送出去既時侯,佢兩隻野都異口同聲話要keep,但轉個頭又係放左係度無玩過。老婆於是又諗左一個好scientific既方法:如果佢地講唔出邊個送既,佢就會送果樣野出去。
至於屋企既其他用品都係根據呢個原則送出,例如餐具、電器同埋傢俬,老婆除左問朋友,就喺啲唔同既環保谷度問有無人要。幸運地,原來呢啲谷都好活躍,而且好多都係一啲有心人真係拎黎幫助有需要既人,所以老婆送出去果時都好放心。
就係咁,我地屋企既野每日逐少咁減少。去到後期我地真係得返張小朋友枱仔圍埋坐凳仔食飯,稱得上「家徒四壁」。
Step 3: 寄走要但又短期唔駛用既物資
我地將可以俾既俾,送既送,清哂我地要送走既野。老婆跟住就開始group返我地要寄走既物資,而亦都係喺呢個時侯,我地要決定搵唔搵公司幫我地搬。
我地送完大部野出去之後,剩返既都係一啲我地覺得係加拿大比較難買到既野,例如一啲中文版玩具、中文書。其餘既就係個人物品,例如人地送既紀念品,或者佢地細個拎過既奬 – 唔知好彩定唔好彩,唔係好多……
老婆睇住個list,預計大約6個箱就可以寄哂我地既野了,所以我地決定自己寄。老婆唔知係邊度搵啲紙皮箱出黎,然後將一啲應該到埗後幾個月都唔駛用既野pack箱,再拎去郵局度寄返加拿大。
不過問題又黎了:每一次我地問阿囡有啲乜野要寄,佢每一次都話無,但隔日又拎一大堆野出黎。另外,因為知道呢邊都無乜機會學中文,所以老婆忍唔住又買多啲中文書同埋啲練習過黎加拿大。原本減少左既list又慢慢加返啲野上去。
結果寄下寄下,我地由當初預既6箱變成寄左12箱,成件事個價錢大約係8000幾蚊港紙,船期大約2 – 3個月。如果你計返數,其實同搵公司搬差不多,不過因為搬運公司果18000係minimum charge,我地用唔著咁多,所以我地個case感覺自己搬化算少少。
Step 4: Pack跟身物資落隨行行李
處理完可以寄既物資,終於入直路pack我地返加拿果程機帶既行李。呢一批物資基本上都係一啲要跟身既物資,例如我地啲文件、電腦、係香港仲著緊既衫褲鞋祙,仲有Covid19 限定 – 口罩 + 洗手液。
講真,其實呢件事真係好花時間。我地有十幾個喼,我見老婆每日都拎佢地出黎好似砌puzzle咁將啲野fit黎fit去,因為又要放到,又唔可以超重;去到臨出發果晚,我地都仲係度攪緊啲喼。如果唔係話佢有鋪執野癮,我諗會痴線。至少我會。
總結
經過左2 – 3 個月既努力,我地漸進式地將我地成屋既所有野全部處理好。偶然喺清理啲舊物件時翻起一張舊相、我細個既一份功課,我地都可以一齊笑返一餐。或者呢個唔係一個最efficient既搬家方法,不過對我地黎講,同時係我地慢慢同香港、同過去say goodbye既一種方式。
而個前提係:你要有一個好鐘意執野同Excel既老婆或者老公。