[姐弟海外升學記] (十三) 驗屋 (home inspection) part 1 – 屋外、屋頂、車房

以前喺香港間屋有乜事,隨時可以搵人上黎整,屋外大圍野又有管理處處理。黎到加拿大無咗呢支歌仔唱,所以如果你買咗間屋有問題你都幾頭㾗下。好彩喺度買屋正式交易前有一個必要程序,就喺搵個驗屋師 (home inspector) 黎check下間屋有無問題。

喺agent介紹下搵咗一個好大舊既外國人做我地既home inspector,唔知點解睇到佢大大舊既身型俾到我一種莫名既安全感,好似佢check完間屋都會實淨咗咁。

驗樓當日行程都幾緊湊,前前後後攪咗幾個鐘,所以我諗要分開兩、三回講:

屋頂

Inspector話趁未落雪,不如走上屋頂睇咗先。睇見佢大大舊咁走上個屋頂,我其實擔心佢踩爛個屋頂多過佢搵到有乜野問題。

Inspector喺個屋頂度行來行去,睇完話個屋頂無乜問題。不過我地屋頂個去水糟(gutter)有好多樹葉,所以等天氣暖返就要搵人返黎清理 (自己上去攪都得,我估大部分當地人都會自己攪?不過….我餚底)。否則融雪或者落雨啲水就去唔到,分分鐘攪到屋頂漏水。

Agent話另一個做法係裝一樣叫做gutter guard既野,原理其實同坑渠蓋一樣。有興趣可以睇下https://www.lowes.com/n/how-to/install-gutter-screens

屋外

睇完屋頂,inspector再喺屋外週圍檢查。佢話我地個driveway個地下好多裂㾗,因為呢度冬天啲人會落啲特別既鹽落地下幫助溶雪;但落得太勁的話個地下會裂開:

不過inspector話:呢個其實好普遍,你可以唔整。

屋外既牆身同樣都有裂㾗,不過佢話呢度好多屋都係咁,唔會影響你住,係個樣衰啲。所以都可以唔駛整。

去到backyard,佢走咗上個deck度行下同埋摸下啲扶手穩唔穩陣,好彩結果都唔錯,唔駛又叫人黎整。呢part俾佢試完好有信心,因為如果以佢既身型都整唔冧,我諗家姐同弟弟都唔會整得冧……

閣樓 (attic)

Inspector跟住入返屋度,走去睇我地個閣樓 (attic)。

佢拎住條梯,喺2樓打開咗一道好似柜門既野後,就見到attic既情況:

我再一次覺得好驚:佢唔係諗住爬入去下話?屋頂真係會塌落黎喎師傅….

好消息:佢無走入去。

壞消息:佢話個attic要整。

Inspector話呢度啲attic通常會有保暖層幫間屋保持住啲溫度。我地呢間喺舊屋,以前啲人會放啲類似木碎上去保暖。一般舊屋呢層木碎都應該有十幾吋厚,但我地間屋….得幾吋:

如果唔攪佢,間屋會好凍,開暖氣用多好多電,所以一定要搵人整。

車房 (garage)

Inspector跟住同我地去睇車房。由於呢間屋係attached garage,所以屋內有一道門通去車房。不過一打開門,inspector已經話唔合格: 道門唔識自動關上。

Inspector話萬一garage著火,啲火就會走入黎;而且車房啲一氧化碳又有機會走返入屋,唔合安全。所以要換個個門較,等佢好似防火門咁會自動關上先合規格。

出到車房,inspector基本上將可以開關既野都走去襟下。除咗開關車房門個掣之外,當車房門關緊果陣,佢特登走埋去阻下道門;如果道門係安全,有野阻住佢應該就會停,咁先唔會夾到小朋友。我地道門有少少神經刀,inspector阻佢果陣唔識停,所以inspector話最好都係搵人返黎較下。


短短睇咗一個鐘左右,已經好似樣樣都要整。我同老婆對望一眼,雖然無減我地對間屋既鐘愛,不過諗起仲有好多野都未check,不禁有少少納悶起黎……

(待續)

Leave a Reply

發佈留言必須填寫的電子郵件地址不會公開。 必填欄位標示為 *

想睇到最新內容?

歡迎讚好「好校爸」Facebook專頁!