[開箱文] 幼兒STEM玩具:自製迷你吸塵機

估唔到我都有得寫下開箱文,不過唔係介紹潮流科技玩物,而係講下比阿囡玩既STEM玩具。

話說老婆係淘寶度見到有教小朋友STEM既教具,仲要平到笑,叫我揀個比阿囡。心諗STEM都有得淘,我推STEM咪仲快過教育局? 二話不說就揀左比老婆落埋單。過左3日就收到。

我地揀既set總共有6個可以自己整既小玩具。睇開箱文梗係要睇下個箱:

打開入面係6 pack獨立包裝既玩具,老婆話不如玩左個迷你吸塵機先。打開個pack入面有:

  • 材料
  • 安裝說明書
  • 智識卡片 (淘返黎,所以全部係簡體字)

未同阿囡「動手」之前同佢講下個智識卡片先:

原來吸塵機係用左個叫伯努利定律 (Bernoulli’s principle)既原理,簡單地講就係話當d空氣由闊位流入窄位時會加快,所以部吸塵機用條幼長既管(即係個窄位)黎吸野個吸力就會大左(唔知我講乜唔緊要,你部吸塵機唔會因為你唔識呢個原理而唔work)。

同阿囡講完見佢都係心急想動手,於是就同佢一齊跟住個說明書開始砌。打開d材料發現有個parts壓爛左…老婆用d膠紙痴返我地又繼續整。

d parts其實都幾細下,阿囡一向唔算手巧,所以整左好耐都唔係好整到,結果都係要我幫佢整 (e.g. 例如上好細既螺絲):

登登登凳!前前後後同佢整左15分鐘左右就整完:

其實覺得阿囡若大少少或者手再巧d應該都幾容易完成。基本上要既材料都有齊,除你要自己拎膠紙痴下野之外。

整完阿囡好興奮咁想試,我地拎左d擦膠碎黎試…又真係吸到woh。

呢個時候老婆行埋黎淡淡咁講:「好啦,以後可以用呢個黎吸你枱面d擦膠碎啦」。

嘩….

原來除左有得玩、有野學、有親子…老婆買呢舊野仲有hidden agenda: 「清潔你張枱」。不由得對老婆既深謀遠慮拜服。

講真究竟咁樣係咪叫做STEM?我真心唔知。但睇到阿囡有份動手做,整完出黎開心地試驗佢個製成品,係唔係STEM又有乜所謂呢?

 

Leave a Reply

發佈留言必須填寫的電子郵件地址不會公開。 必填欄位標示為 *

想睇到最新內容?

歡迎讚好「好校爸」Facebook專頁!