[阿囡小一上學記] (十六) 英文考試的溫馨提示

阿囡間學校放完聖誕假就大考,考完中文科之後就輪到英文科。

一如上次溫習中文科,同阿囡拎左範圍紙出黎溫習。發現英文科既範圍紙充滿了愛:入面有好幾個窩心又實用既溫馨提示。

首先,範圍紙上列出左考試會考既生字,但係生字下面出現一句諗都無諗過會出現既字句:

考英文唔駛識串啲生字?我覺得唯一能夠勁過呢個安排既只有考數學唔駛識數目字。

繼續睇落去,先知道原來阿囡間學校要考英文口試。口試有三部分,第一部分看圖講故仔;老師會比張圖你然後問問題,例如問下張圖入面天氣點樣,有幾多隻動物,啲動物係度做緊乜野。範圍紙上提醒同學要答「complete sentence」。

第二部分就考你對答,老師問你一啲簡單問題,例如你鐘唔鐘意去野餐、你去野餐會帶啲咩等等。範圍紙上提醒同學要「elaborate」個答案,唔好就咁答yes no就完,最緊要講點解。

不禁回想以前自己細個讀書,我地係到左六年級,學校先叫成班同學走去尖沙咀同啲外國遊客講英文當一個project。自己儲左成個鐘頭勇氣先夠膽走埋個鬼佬講聲:Nic….nic….nice to meet you,講完仲差不多要彈開十尺驚死佢真係同你傾計。

時至今日到左阿囡呢個generation,小朋友屋企可能有菲傭,返到學校又可能有外藉老師;要佢地開口講英文,大概已經唔係好似我地以前咁艱辛了。

忽然驚覺自己修練多年既「I agree with you」已經無用武之地。因為….你連點解agree with you都要elaborate。

口試第三部分考phonics,老師會比句野小朋友讀考下佢用phonics拼字讀既技巧。呢一個部分真係要睇阿囡既造化,畢竟我細個都無學過phonics,只係用「通勝拼音法」拎啲近音中文字去幫自己記:

相片來源:高登討論區

睇完口試既範圍,再一次覺得自己真係幫唔到佢好耐。

最後,範圍紙上出現英文老師既幾個關於應考時既溫馨提示,其中包括:

  1. Listen to the instructions first before answering the questions.
  2. Don’t spend too much time on one particular part.
  3. After you have finished the paper, please check if you have completed all the parts and make sure that there are no careless mistakes.

我相信以上既溫馨提示,尤其最後一點,我同你都應該講過至少幾十次。不過,我始終相信「老師講一句,好過你講一百句」。盼望阿囡睇完老師既提醒,多多少少可以上心啲,考果陣真係會check下卷吧。

結果考完一星期,學校終於派返份英文卷返黎。打開一睇,見到份卷人地明明寫住「sing」,佢抄返落去果陣變左做「swim」……


或者下次考試,叫老婆唱呢隻歌比你聽左先。

Photo credit: Peter Tuan @ Flickr

Leave a Reply

發佈留言必須填寫的電子郵件地址不會公開。 必填欄位標示為 *

想睇到最新內容?

歡迎讚好「好校爸」Facebook專頁!