我覺得加拿大真正既入藉試，係加拿大既冬天。
朝早一覺醒來，天色都仲係黑沉沉。望出窗外，經過一個下雪夜，地下已經積累咗30 – 40cm既積雪。
急急忙走出門外想趁未有行人清理一下，發現打開門口果一下好似打開雪櫃度門，因為室外同雪櫃一樣係零下十幾度。原本啱啱起身個身仲未warm up，正覺得有一陣陣寒意；但鏟左一陣雪後，著咗成身耐寒衣物既自己已經大汗淋漓。又冷又熱，幾乎就係一條生病formula。
天開始光，出門走在街上，睇見馬路上遍地又灰又黑夾雜灰塵同泥濘既「污糟雪」，好似有人將一條馬路份量既灰色思樂冰倒瀉咗一樣。其實有雪都還好，有時候天氣稍稍回暖，地下既積雪融化後又因晚上低溫結成冰，結果不論行人路還是馬路都變成天然溜冰場。
好不容易到咗下午，落咗一個上午既雪，又要出去鏟雪。我不時納悶：到底應該等佢落完先一次過鏟，定係分好多次出去鏟好呢？宜家唔整陣間可能難整啲？再唔整隔離屋80幾歲既伯伯就出動㗎喇喎，但我其實返緊工㗎喎。我覺得自己好似一個面對一大堆暑期作業既小朋友：應該等埋一次做，但分開好多次做先無咁痛苦？
然後下午四五點，天開始入黑了。個感覺好似自己乜都無做過之下，一日就咁結束了。
當然，加拿大既冬天唔係每日都係咁樣。例如落雪，成個冬天比較大雪既日子可能都係得幾日吧。不過呢種晝短夜長、遍地積雪、成個彩色世界好似被大雪染成只有黑白既日子都會持續好幾個月。
我覺得想要好積極喺生理同心理上適應呢度既冬天，係難過入藉試果二十條MC。正如我舊老細成日同我講：Calgary既冬天係殘酷(Cruel)的。有時聽到啲人話外國既冬天令人抑鬱，我由起初既「唔係吓話」，到宜家變成相信。至少，我每次鏟完雪都多少有啲「鏟後抑鬱」。
不過儘管如此，我還是留下來了。無數移民、當中不乏好似我一樣由細到大享受開熱帶氣候既人，都留下來了。
上次去多倫多同一個剛移民咗黎加拿大兩、三年既印度同事傾計。印度同事不停數落多倫多有幾落後、交通有幾差；然後埋怨大部分既媒體成日將印度描述成一個落後國家，其實印度不知幾先進、比加拿大先進得多。
但當我問印度同事有無諗過要離開加拿大返返去印度，佢卻斬釘截鐵地回答：「of course not」。
點解？
「印度好熱呀。加拿大既天氣啱我多啲。」
正所謂「有人辭官歸故里，有人漏夜趕科場」。當有人因為加拿大既冬天而卻步，有人卻因為加拿大既天氣而留下來呢。
我想，我地呢班喺加拿大、喺Calgary「留下來的人」，同樣都有一個情願捱呢個冬天都要留下來既理由同信念。人真係好得意，我地唔想做一件事，可以有千萬個理由；但有時想做一件事，只需要一個理由就夠了。