因為新工間公司喺多倫多，所以我入職大半年都從來無返過office。最近公司部門攪咗個event，邀請埋喺多倫多以外地區既同事出席，於是我終於第一次黎到多倫多。
自從移民加上Covid之後，好耐都無試過一支公出去公幹了。比起一家大細去旅行，自己一個雖然孤獨啲，更沒有老婆全天候安排好唒行程既每一步，但卻有另一番自在。唔駛成日好似打波人盯人咁𥄫實弟弟有無自己走咗去，亦唔怕蕩失路又或者搵唔到廁所。
今次既快閃多倫多其實只有日半時間，其中一日要返公司，只有不足半日可以自由活動。因為大部分活動都集中喺downtown，所以我喺近downtown其中一個subway站附近用公司有限既budget book咗間Airbnb方便出入。
我安排俾自己半日既節目有：參觀Bata Shoe Museum（一間關於鞋既博物館）、去St Lawrence Market食Lobster Roll、同埋去Toronto Sign影一張「到此一遊」既相。
短短既日半行程，令我覺得多倫多好方便。由機場出巿區（Union Station）搭機場快線（UP Express）只要半個鐘；去到巿內轉搭地鐵（TTC）或者Streetcar (類似輕鐵)又好方便，至少我覺得喺Calgary就無咁既交通網絡了。
不過當我同同事講出我既感受，大家都不約而同地覺得：傻豬黎既，你試下日日由屋企搭過黎返工，保證你會收返「多倫多好方便」呢句話；然後大家用一個鐘解釋多倫多有幾大、有幾塞車同個subway有幾舊、幾迫同幾唔reliable。更重要既係：大部分人其實都唔會住downtown附近，所以日常生活中，唔會有人好似我咁樣commute。
我諗以遊客身份vs以居民身份去看待一個地方，永遠都會有截然不同既感受。例如好多人都鐘意去日本玩，但喺果度住可能係一件苦差。老婆因工作關係住過兩年，發覺住喺日本係超大壓力，同去旅行係完全相反既體驗。
對我黎講，多倫多係女神; 但對我同事黎講，多倫多係女友。當我仲喺度欣賞緊女神啲秀髮幾咁飄逸，我啲同事卻係俾呢個女友每分鐘check住喺邊、每分鐘俾佢質問點解唔覆佢果個message。
聽同事呻完一輪，我諗我暫時都係比較想做多倫多既遊客多啲。希望下次有多啲時間可以真正感受多一啲多倫多吧。我特別暗自起誓：我下次一定要入場睇一場NBA，仲要帶埋小球迷弟弟一齊黎。
