放假前，部門主管忽然叫我去學另一個同事做緊既野，然後俾我兩星期時間deliver。
以我既工作範圍，理論上我係無乜理由做我同事做緊既野；而且我仲要放一個星期假去墨西哥，返到黎先開始學真係好趕。我同部門主管商量改後啲個deadline，點知一向都好reasonable既佢竟然少有地要求我無論如何都要兩星期後deliver。
唔知道外國人有無「鬼叫你窮呀，頂硬上啦」呢句說話。不過作為打咗廿幾年工既老油條，我感覺到今次應該都係走唔甩，所以唯有硬食照做。
兩星期過去，我意外地pick up得個task幾好，應該可以如期交功課。當我諗住搵教我果個同事再傾下，卻發覺同事個online account忽然deactivated咗。
我覺得有少少唔對路。因為喺舊公司果陣，通常係個同事辭咗職佢個account先會deactivated。轉個頭收到一個全公司突發大會既meeting invite，令我確信自己不祥既預感。
公司大部分人都係work from home，所以大多數人都係online參加呢個突發大會。大家都mute咗自己把聲，令呢個超過一百人既大會都變得寂靜，同時令原本繃緊既氣氛更加凝重。我猜想出現喺呢個大會既同事大概都同我一樣心中有數。
CEO打破呢一片寂靜，徐徐地將一個大家都預料咗既消息講咗出黎：「好遺憾，我地今朝裁員了。我地有部分既同事、朋友，由今日開始將會離開我地公司。」
換句話說，包括我在內，宜家出席緊呢個大會既人，算係有得留低既「生還者」。
CEO用咗三分鐘時間解釋成件事，然後再交俾另一位高層同我地全體同事debrief。奇妙既係，儘管高層們講咗一大堆野，我地卻依然無法理解今次裁員既原因同狀況。我再次確信能夠講咗好多野但又乜野information都俾唔到你既人，先可以做到高層。我唔怪佢地，因為好多時阿仔問我點解唔同佢玩，我諗我啲答案可能都係差唔多。
我亦終於明白點解部門主管咁insist要我用兩星期pick up同事啲野，因為佢地一早諗好咗兩星期後既今日郁我同事。我越諗越心寒，因為如果我真係pick up唔到，咁佢炒果個會唔會係我呢？
大會喺同開始時一樣既沉默中結束，隨之而來係我地呢班「生還者」喺online chat度互相報平安，同時了解下有邊個唔好彩俾人炒咗。我地發現今次公司炒既同事當中竟然不乏high performer，好多仲係喺公司做咗好多年、我地心目中表現出色既員工。
我覺得自己好似一個平時啱啱好合格既學生，宜家睇住年年考頭十名果批學生一齊俾人踢出校。咁我以後仲駛唔駛俾心機讀書好呢？我諗唯一安慰，係如果他朝有一日我俾佢炒咗，我都可以挺起胸膛同自己講：「嗱，呢單野唔關我事㗎。傑出員工佢都照炒啦。」
計埋今次，我黎咗加拿大做咗四年野，已經係第四次遇到公司炒人。雖然今次再次逃過一劫，不過公司少咗一班人但workload照舊，大家恐怕都要頂多幾個project黎做先攪得掂。例如我啱啱喺我同事手上pick up、本來完全唔關我事既work，恐怕以後都會跟住我了。
不過一如既往，就算宜家要辛苦啲做多啲野，我都唔會埋怨。
因為鬼叫我窮呀。
頂硬上啦。