我同好多香港人一樣，從小就訓練自己做一個夜鬼。
我小學係讀下晝班既。閒日六點放學七點返到屋企食飯、做功課、沖涼再睇電視，無十一、二點都唔瞓。到咗星期六早啲瞓？NO，我比平時更夜瞓，因為要捱夜睇卡通片《聖鬥士星矢》。我諗我係第一個因為節目調動無得睇《聖鬥士》而咀咒《歡樂滿東華》既人。
入咗大學，我比以前更夜瞓；除咗忙碌地ICQ，有時會喺學校lab通宵做功課，一完project又成班人去通宵唱K。到出黎做野，一入行做agency (類似廣告公司)，基本上只係再不斷重複大學時代既熬夜模式：OT又通宵、玩又通宵……
漸漸地，我覺得自己夜晚比日頭更精神，亦慢慢更喜歡深夜時份特有既寧靜。
黎到加拿大，因為呢邊啲鋪頭晨早閂門無乜夜生活，原以為自己就會乖乖一早去瞓，但我冇。我相信如果你都係夜鬼你就會明白，做夜鬼同做殭屍一樣，一做咗就無得返轉頭。
不過因為轉咗份新工，我宜家要做一隻早起身既夜鬼。
新工間公司其實係based喺Toronto，同我身處既Calgary有兩個鐘時差。例如Toronto 9:00am，喺Calgary只係7:00am。上司好好人，俾我揀返邊個timezone。
如果揀返Toronto時間，就要晨早7:00am開工。作為一個有幾十年經驗既資深夜鬼，我有啲猶豫。因為喺朝早七點，我唯一溝通到既人只有周公，老細你地呢啲凡人我咁早溝通唔到。
睇牌面，感覺返Calgary時間比較啱數。但除咗夜鬼，我本身係仲有另一個好重要既身份 – 懶鬼。
我既懶鬼心聲話俾我知：反正我份工係remote work又唔太需要見人，無論起身個樣幾衰都唔駛執 (亦無得執吧)，只要7:00am死到去開著部電腦就攪掂，何樂而不為？
而更重要既係：7:00pm返工，即係3:00pm就可以收工。
有咩人係返早然後放3:00pm? 係學生。我呢個大叔一把年紀仲可以好似返學咁既時間返工，仲要唔駛著校服。
雖然7:00am返工，令我少咗睡眠；但3:00pm放工，令我返回童年。
如果喺香港，我大概唔會選擇早放工。因為香港係無「夠鐘放工」呢個concept，只有「夠膽你就放工」。你早收工，不過係延長你開OT 既時間。但喺加拿大既職場，就算老細自己OT，都好少收工後拖你落水。
所以最終我都係揀咗跟Toronto時區，每日七點返工。雖然每朝我都好似喪屍一般，不過至少每日下晝三點鐘，我就同大部分學生一樣浴火重生，由喪屍變返正常人。
唔知如果你係我，你會點揀？
#夜鬼揮手區