[姐弟海外升學記] (十五) 海外搵工記:「我去到做咩呀?」

移咗民,小朋友返學住屋都叫做有所著落,不過終究要面對一個好現實既問題 – 搵食。

一講移民,可能好多人既第一個反應係:「我去到做咩呀?」。再仔細啲去breakdown呢句說話:

  • 去到外國我有無得做返我本行㗎?
  • 去到外國我搵唔搵得返宜家咁多錢㗎?
  • 去到外國我係咪要降職,什至重新黎過㗎?
  • 如果搵唔到本業,我係咪要乜都做㗎?
  • 就算我乜都肯做,有無肯人請我地呢啲新移民㗎?

當任何人處於comfort zone或者所謂既「收成期」,然後再望下上面一堆未知過未知既問題,答案真係呼之欲出:梗係唔走啦,去到外國食風咩。

講真,喺我離開香港果時,我對以上問題既答案係無乜掌握。唯一我可以肯定既係呢堆問題係唔會有”model answer”。無人可以話你知:「放心啦,一定搵得返㗎」,亦無人可以同你講:「你去到一定係洗碗啦」。想搵出答案的話,唯有自己去親身尋找。

學戴志偉(足球小將)話齋:「答案,就在球場上」(讀得書少啲quote喺咁上下……)。唔落場,永遠唔知結局係點樣。

姑且講下我既落場經歷。

離開香港既時候,我好幸運有帶住少少freelance既工作過黎加拿大,所以一下子不至於無野做無收入。雖然黎到加拿大仲可以同香港繼續做freelance係好理想,但呢個工作模式一樣有佢既限制。首先,好多呢度公司既benefits,例如成屋人既保險,我如果唔搵份工,我係享受唔到。而且我越唔投入工作巿場,我越老就越難了。萬一香港既工作斷咗咁到時點算?所以喺加拿大搵一份工作,始終係一個長遠目標。

返返頭先移民後搵工既第一個問題:去到外國我有無得做返我本行㗎?就我個case,好好彩係有既。我上網睇LinkedIn、IndeedGlassdoor,其實都搵到同我行業相關既職位。先唔講職位人工高低又或者係唔係exactly同以前做既野一樣,但起碼我知道有機會唔駛轉行。

我開始寫求職信。發現自己自畢業以來都好耐無寫過求職信了,因為以前喺香港,幾乎啲headhunt都係喺LinkedIn度直接搵我。但呢度其中一樣唔同既地方係份份工都幾乎要求你寫求職信,每份工都要執下封信同CV去match份工既需求,所以想懶啲都唔得。

唔覺唔覺寄咗十份工,無乜聲氣。有聲氣果啲就係email禮貌地同你講覺得你不適合。覺得慌之餘,又覺得自己拎住十幾年既經驗都無人問津,多多少少有啲泄氣。尤其係當覺得自己已經係申請緊以前自己下屬個role都依然不得要領,就越來越著急。

身邊既親友有人同我講,你唔係無經驗,不過喺無加拿大既經驗,而呢樣野喺呢度好重要。心裏明白之餘,又有啲唔忿氣:加拿大既經驗同香港既經驗真係差咁多嗎?以前都叫做喺啲international既公司度做呀。再者…..你地唔請我,我點累積我既加拿大經驗呀?

唔忿氣還忿氣,但現實始終係現實。於是,我開始搵啲再少經驗既工,什至係好入門既junior role,覺得只要做得返本行而喺呢度入到行,都無乜所謂了。 事實上,我終於收到第一個回應:「我地呢個role係差不多請fresh grad既,你係咪真係打算黎做?」

我亦開始試下搵一啲少少唔關事既工,例如去教書。諗住以前都有教過下啲夜校同去大學度做過下talk,可以掹下車邊。

不過,依然無乜聲氣。

正當我信心相當動搖之時,忽然有一個HR喺LinkedIn聯絡我:我地有一個role,覺得你幾適合。你有無興趣同我地傾下?

一睇之下,我發現份工既性質同我以前幾乎算係一樣了。我爭啲想答佢:我lur飯應啦。話時話…”Lur”字係咪英文黎? 或者我應該答佢”I am rice-lurring to tell you I am interested”。

(待續)

7 Comments

  1. Hello, 我擔心去到Canada 揾唔到marketing 工,你呢篇blog 簡直講晒我既憂慮,可以請問下你揾左幾耐工嗎?同埋好多人講既Canadian experience 其實係包括D咩?

    • 我其實唔算搵咗好耐;我本來做緊d香港freelance,做做下有人喺LinkedIn搵我。我應該係黎咗4個月左右就搵到。加拿大經驗….其實咪喺加拿大做野既經驗囉,講真無乜好具體答案。如果想傾多啲你可以去我FB留言我同你再喺果度傾會易啲。

Leave a Reply

發佈留言必須填寫的電子郵件地址不會公開。 必填欄位標示為 *

想睇到最新內容?

歡迎讚好「好校爸」Facebook專頁!