Pass咗citizenship test大約一個月，終於收到移民局IRCC通知，可以行埋申請做加拿大公民既最後一步：參加加拿大入籍典禮。
入籍典禮喺downtown既政府合署舉行。對上一次黎呢個地方已經係四年幾前，當時我地一家到埗後第二日去攞SIN (Social Insurance Number）。回想當日滿懷忐忑初到貴境，到今日已經喺Calgary渡過幾個寒暑，感覺有啲彷如隔世。
我比典禮時間早咗十五分鐘到達，入籍典禮既禮堂外已經排咗一條長長既人龍。排咗差不多三十分鐘，我辦好登記手續，拎住登記職員送俾我既加拿大扣針同小國旗進入入籍儀式既禮堂。
禮堂既盡頭係移民官既主禮台，左右放咗國𣄃同省𣄃；主禮台既背景係一片穩重既暗紅色，側邊既牆身印有Calgary downtown同加拿大大自然既圖案。參加者既座位沿主禮台以弧形排列，目測大約有百幾個座位。座位上有編號，各位準citizen根據自己既編號坐低，親友則坐喺另一邊無編號既觀眾席。觀眾席旁既牆身掛咗一幅好多唔同種族既人既合照，感覺正係加拿大引以為傲、種族共融既象徵。
主持宣布典禮正式開始，全體起立迎接移民官。移民官係一位年長既白人女士，有半金半白既短髮，戴住一副班馬紋既「烏蠅鏡」眼鏡。佢個子唔高，著住黑色長袍既佢慈祥又莊嚴。
主持播放咗一條本地原著民既歡迎短片之後，移民官開始致辭。
移民官話呢一刻喺禮堂入面，其實有一百位來自世界上三十三個唔同地區既人將會成為加拿大公民。放眼望去，在場既準citizen都來自不同族裔：有白人、黑人、華人、南亞裔人、印度人等等，正好係加拿大多元文化既縮影。
移民官解釋加拿大多元文化既重要，同時勸勉大家要多同其他加拿大人互相了解，亦鼓勵大家享受公民權利既同時，亦要努力盡公民既義務。移民官語重心長地提醒我地：如果唔去投票選出自己心目中既政府，咁你只能「get the government you deserve」。
最後，移民官話要俾在場所有準citizen一個認真既建議：「唔好咁快收埋啲冬天衫。你七月都仲可能要著。」說罷全場大笑。
移民官致辭完畢，主持宣布全體起立宣誓。移民官宣讀誓詞，佢講一句、全場所有人跟住講一句。雖然我地只係喺自己個座位度宣誓，不過現場係有人職員來回監察我地每個人係咪真係有宣讀誓詞。
我地讀完英語誓詞，跟住移民官既發音讀埋法文版本。讀完兩篇誓詞，移民官開玩笑地同大家講：「恭喜大家，你地學識咗法文了。」
宣誓完畢，主持開始逐個人叫名上台攞公民証書。派到差不到一半，主持忽然暫停，然後叫出面既職員入黎。原來職員攞錯咗今日下午第二場典禮啲公民証書，要出去搵返啱果批先可以繼續。咁緊要既儀式都會攪錯，我覺得呢件事本身都幾Canadian。
主持終於叫到我個名。我上前同移民官握手，移民官問我來自咩地方，我答佢「香港」。移民官聽到之後同我講：「我以前都喺香港住過，香港係一個好美麗既地方。不過我好耐無再去過了。」言語間有啲唏噓。
用咗大半個鐘，一百張公民証書終於派完。主持再播放咗一段總理杜魯多既歡迎影片，然後我地再次全體起立唱國歌。
我其實係第一次唱加拿大國歌。唱咗頭兩句，忽然感覺到自己雙眼發熱，然後我就開始哽咽唱唔到落去。唔係因為加拿大首國歌特別煽情、更唔係我忽然愛國。只係喺此情此景，回想起移民路上既高低起跌，有興奮過、失望過、感動過、掙扎過、努力過、困惑過……一時間八感交集，無法制止內心既激動同感觸。
或者比起好多人，我既移民之路算係極之平坦。不過呢一刻，我覺得自己有資格挺起胸膛講一句： 「阿媽，我得咗喇。」
隨住歌聲結束，入籍典禮正式完結，我終於成為一個真真正正既加拿大公民。儘管法律上我成為咗一個Canadian，但我知道我仲有好多真正Canadian既野未學識、未做過。
例如係我每日都好想做既罷工….
認真地，我會珍惜自己成為Citizen既權利。我明白呢啲權利，係如此得來不易亦非必然。
希望自己會喺呢條移民路上，同我既小朋友一樣繼續成長。
呢一篇係我寫咗四年既《姐弟海外升學記》既第一百回。呢一百篇既故事，見証住我呢4年移民之路既起點到成為公民呢一刻。多謝有睇過、like過、share過、comment過呢度每一段文字既大家。同大家喺網絡上少少既圍爐互動，係我移民路上一大慰籍。
感激每一位我喺移民路上遇上既人。唔係你地，我大概不會出現喺呢條移民路上，更無可能保持平常心渡過喺異地既四年時間。
最後，我想將移民官最後俾我地既一席話，送俾每一位同我一樣、正在移民路上努力既人：
「唔好忘記你既老家，唔好忘記你既過去，唔好放下你既文化，更唔好忘記你既自我。移民，唔代表要同你既過去訣別。將佢地統統帶入黎呢度、融入黎呢個大家庭。」
「Welcome to Canada。」