如果要用一個字形容我既2023年，我會用個「困」字。
記得2023年既呢個時候，自己都幾抑鬱同迷失。因為工作關係令移民後既生活有啲失衡，個感覺好似參加緊一場已經分咗勝負既球賽，自己作為輸硬既一方，只係不斷咁來回漫無目的地跑來跑去，無方向、唔知自己喺度做乜、覺得自己做乜都無乜意義。
黎到2024年尾，我會用個「脫」字去形容過去呢一年。
2024年頭既轉工令我首先喺時間上脫困。雖則早咗好多起身，不過唔駛返公司、工作亦無咁忙，時間flexible咗好多。多咗時間，所以多咗機會接送小朋友，我開始無以前咁怕揸車，令我空間上都稍稍解困，同時令老婆唔駛成日都要出車咁困身。
今年更加有三次外遊既機會：一次返香港 + 日本、第一次去多倫多做野、第一次去墨西哥玩。我感受到自COVID以來種種travel restrictions移除後既自由。我唔駛一定要困喺Calgary，仲可以去好多地方開眼界。
所以今年對我黎講，算係脫困既一年。我諗我唯獨始終無法脫離既(大概永逺)，係財困吧。
2024年喺困局中慢慢走出來，談不上有啲咩目標。2025年我既目標，應該依然係個「脫」字。
唔係脫衣，更希望唔係脫髮。
係脫脂。
祝福大家2025年都可以一齊「脫」 – I mean….灑脫個脫啫。