我同弟弟今次揀咗跟教練學ski唔學snowboard，因為我聽咗阿囡話學ski易過學snowboard。Ski係「易學難精」：唔緊要，因為根本無諗過要精，最緊要易入門。
不過更大原因，係因為我見親啲人玩snowboard都要用條腰扭來扭去。
但我無腰。
滑雪場既入口擠滿黎學ski既小朋友同家長，所以教練叫我同弟弟跟住佢行去一個比較空曠既地方先開始。
教練首先教我地點樣著ski同除ski，然後俾我地試下喺個雪地單腳著ski滑行。試咗幾次之後，教練叫我地著哂兩個ski，然後教我地呢堂最緊要既野 – Pizza。
「Pizza」，係滑雪果陣想減速或煞停時要做既動作。之所以叫pizza，係因為做呢個動作既時候，兩隻腳要將ski個頭向內靠攏、ski尾向外伸展，令兩個ski排列成好似一塊pizza slice既形狀。
我同弟弟原地pizza咗一陣，教練話帶我地去magic carpet度試下。喺我周圍望邊度有magic carpet同阿拉丁神燈之際，教練帶我地黎到一個小小既斜坡，側邊有一條好似行李輸送帶，上面寫住Bronze。原來magic carpet係指一條可以帶滑雪客上斜坡既輸送帶。
我同弟弟首先要挑戰既係Bronze magic carpet，教練叫我同弟弟試下滑落黎，慢慢用pizza減速到停。
弟弟首先出發，見佢落得好慢，不過至少順利直線落到底。輪到我既時候，可能坡頂上比較平，我慢慢向前移動左一陣都滑唔到出去。正當有啲心急，一用力，我忽然加速向下滑落。
我諗住開始用pizza減速，但唔知點解我忽然大幅度轉彎，衝向左邊既magic carpet。我好驚，個pizza整得更大，好彩趕得及喺carpet前停低。
教練：「嘩好彩你無撞埋去啫。我覺得你落既時候兩隻腳用力唔平均，所以你側埋一邊。唔緊要，第一次啫，落去上黎再試。」
第二次再試俾第一次好咗少少，不過可能因為太緊張，我個pizza動作開得太大令我滑咗幾下就中途停咗。我又同時發現自己控制唔到兩腳既力，結果無意識地轉彎。
當我第三次搭magic carpet上去果時，見到弟弟已經可以輕鬆一條直線滑落到底。本來諗住弟弟運動神經麻麻又好抗拒黎學滑雪應該好難學識。但睇黎佢會學得快我好多。
教練好似睇穿我內心一樣，同我講：「小朋友通常係容易學過大人㗎，加油！」
滑多幾次，我開始覺得自己個身無咁僵硬。教練見弟弟做得幾好，叫我繼續自己練直線，佢去教弟弟點轉彎。玩咗幾下，見到弟弟已經可以左右扭過啲雪糕筒。好老實講，見到弟弟做到，仲開心過自己做到。
教練：「其實你地都練咗一輪，想唔想去對面既silver carpet 試下？我覺得你地都可以。」
Silver carpet，顧名思義應該係比Bronze高一級，個斜坡會斜啲同高啲吧。我見弟弟已經master到bronze carpet但我連直線都好勉強，於是叫教練不如帶弟弟過去silver carpet先，我留喺bronze carpet自己再練習。
教練同弟弟過去silver carpet之前，教我點樣轉彎。基本上係兩隻腳施唔同力；例如左腳大力啲，身邊就會轉向右邊。我練咗幾次，次次都係轉到少少就停咗。諗起都覺得自己好攪笑：頭先唔想轉彎果陣就轉彎，宜家想轉彎果時又轉唔到彎。
望下個錶，原來我地已經練咗差不多個半鐘，只係得返唔夠30分鐘了。人一世物一世點都要試下，我決定滑埋呢一次bronze carpet就過去silver carpet搵返教練同弟弟。
我開始滑行，一開頭滑得幾順，心諗不如最後一次再試下轉彎。我開始兩腳用唔同力度，點知忽然失平衡又衝向carpet。我情急之下又黎個急停pizza，然後下一秒我已經坐咗喺地下。因為雪厚又成身厚衣物，跌低其實一啲都唔痛，但問題來了：教練無教過我跌咗點起身。
我坐咗喺地下度，好似一隻反轉咗既烏龜咁翻唔到身。我唯一諗到可以解救自己既方法就係用手除咗對ski之後爬返起身。我伸出右手去我右腳ski上面個安全掣，但我發現我件衫入面好似有啲野頂住，令我右手無法順利掂到個掣。
Oh wait。係我個肚腩。
就係個肚腩頂住果少少，我隻手差少少先可以襟到個掣。我諗起張學友一首舊歌《這麼近，那麼遠》- 「就欠一點點，但這一點點，卻很遠」。
我用力縮肚，同時右手奮力再伸向右腳ski個安全掣。「咔嚓」一聲，右腳既ski終於脫離。
其實以我宜家「粗身大勢」，就算無ski就咁喺雪地跌底，要起身都有啲論盡。結果我出盡九牛二虎之力先除哂兩個ski爬返起身。
我今日終於發現，其實宜家最唔聽我話既，唔係家姐、亦唔係弟弟。
係我啲手手腳腳。
( 待續)