細個讀書果陣好唔鐘意讀化學(Chemistry)。除咗個阿sir教得好差、大半班人要出去搵K Kwong 補習,化學本身亦比起其他理科科目更多野要記。
「如果我想記野,我就去讀文科啦」。我記得細個既我係咁諗。
所以當日考完A-level,我係心入面立下重誓:我餘生都唔會再學Chemistry。
不過唔知係咪報應。弟弟竟然好鐘意Chemistry。
弟弟因為好鐘意啲有系統、有規律既野,老婆喺弟弟細個果陣索性俾咗個化學元素週期表(periodic table)俾佢睇,點知佢竟然鐘意咗呢樣野。佢對週期表入面118種唔同元素既熱情同了解,大概好似其他小朋友對Pokemon一樣吧。
見弟弟咁有興趣,我同老婆於是買咗一盒叫做《Happy Atoms》既遊戲俾佢做今年既生日禮物。
《Happy Atoms》遊戲入面有大約二十個週期表上既元素模型,將唔同元素好似lego咁「組合」就可以產生唔同既物質。例如將兩個H (Hydrogen) 加一個O (Oxygen),就可以組成H2O (即係水)。用遊戲既手機或iPad App用鏡頭scan你組合咗既物質,個App就會解釋個物質係乜野,仲會介紹有乜用途。

弟弟收到禮物後,根據手機App既內容樂此不疲地將不同元素組合,轉眼已經unlock咗好多app入面有紀錄既物質。
弟弟(興奮):「爸爸,你睇下我砌咗個新既molecule呀。」
我:「好野喎,你砌咗啲乜野呀?係咪H2O呀?」(淨係識H2O既老豆)
弟弟:「唔係呀,我砌咗2-Methyl-1,3-butadiene。」
忽然聽到外星文既我,爭啲連我口入面果啖H2O都噴埋出黎。
弟弟拎個App俾我睇,個App上面顯示住2-Methyl-1,3-butadiene呢個水蛇春咁長既化學名稱。
弟弟:「點解佢個名咁長既?點解佢係1, 3既butadiene?」
我睇到個化學名稱已經有少少頭暈,好想打發弟弟叫佢自己慢慢睇。不過睇到弟弟雙眼發亮、求知慾滿滿既表情,我覺得呢個實在係一個好好既bonding機會。
還好,呢個年代有Youtube。
於是,我打破當日唔再學Chemistry既誓言,同弟弟一齊上Youtube搵有無人講點樣將啲化學物質命名。其實我都有少少idea,因為我記得細個讀A level化學果時有教。當然,我係考試之後果日已經將所有知識連本帶利還咗俾我化學阿sir。
我地一齊睇咗兩條大約十分鐘既片,睇完再重新研究呢舊2-Methyl-1,3-butadiene,然後兩仔爺講出教育電視既經典對白:「我明喇!」
弟弟攞住新既知識,滿足地繼續沉醉喺佢既化學世界當中。我諗當小朋友有興趣想自發學野,果下衝勁真係擋都擋唔住。
化學阿sir,估唔到你三十年前教我既野,我今日終於用得著。
只係我無諗過,個用途竟然係陪個仔玩玩具啫。