大家仲記唔記得中學果時上科學堂係點既？
我記得其中一個成日重複既畫面，係我地做實驗猛咁抄低啲數據，然後走去fit落一條由一個個名又長又難讀 (因為係英文譯名) 既科學家、喺N年前發明既一條公式，証明條公式係work既。如果唔work呢？再做過個實驗？No。梗係改啲數據去就啦。
咁大家估下黎到加拿大，阿囡中一既科學堂會學啲咩？
係學上火星。
阿囡呢期既科學科主題係火星殖民。學生要分組用三個月時間策劃呢個火星殖民計劃，過程中學生會同其地組別爭奪叫做「Musk Bucks」既積分 (上火星當然一定關Elon Musk事)，雖則唔知攞咗有乜用。
佢地首先要做research去了解地球同火星既分別，設計兩個星球既模型作比較；跟住佢地會著手去設計一個可以令人類喺火星上生存既基地，當中要考慮火星上有可能遇到既難題：不同重力、溫度、氣候、天然資源….
佢地同時要有效管理佢地啲資源，確保佢地既計劃唔會out budget爛尾。佢地仲要進行一啲模擬(唔知係咪又係用ChatGPT) 測試，睇下佢地既設計應唔應付到火星既環境。最後，佢地一樣會做實驗，測試唔同物質點樣可以保護到喺火星生活既人類。
淨係聽個course既內容，可能你會覺得學校似係教佢地寫科幻小說多過教佢地科學知識。其實唔止係科學，呢度讀書無論邊一科，學校都無我細個喺香港讀書果陣咁著重你要學識或者點應用某個知識。呢度既學校著重教學生既係如果出現一個問題，你應該點樣思考去解決。
例如數學，以前細個喺香港背咗個乘數表就即刻埋位學點用佢黎做兩個位三個位乘法，越難計越好。但呢度係調返轉，你就算背哂成個乘數表識得計四位乘法，佢反而會走返轉頭問：點解乘數表會work？如果呢個世界係無乘數表既，咁你有乜野方法做乘數？
同理用於科學科既呢個火星殖民課，老師著重訓練既未必係科學理論或者乜乜公式呢啲「硬知識」，而係小朋友既scientific thinking，同埋更重要既「想像力」。
畢竟N年前，都曾經有一個一樣係個名又長、又難讀既科學家講過：
「Imagination is more important than knowledge」
邊個講既？
.
.
.
.
.
.
.
.
.
.
阿爾伯特·愛因斯坦 (Albert Einstein)。