[姐弟海外升學記] (107) 籃球

我由細到大都鐘意打籃球。黎咗加拿大因為啱timezone,我開始睇返NBA,夏天天氣好仲會去附近公園射下波。

我諗我呢份對籃球既鐘愛,終於感染埋弟弟。雖然弟弟鐘意籃球既原因,我估係因為籃球有好多佢鐘意既元素 – 「數目字」。畢竟好少運動個比數會咁大同啲分加得咁快,而且又有一大堆statistics (得分、籃板、助攻、命中率…)。

老婆見弟弟難得對一個運動有啲興趣,於是幫佢報名參加籃球班。

籃球班每星期有一次一小時三十分鐘既練習:5-10分鐘熱身小遊戲,大約45分鐘基礎練習 – 拍波、傳波、射波,最後20分鐘分兩組打比賽。

每次分組比賽既時候,都係我血壓上升既時候。

因為弟弟好多時都喺度夢遊球場:進攻既時候走到遠一遠唔去攞波;防守既時候企喺度望住人地,又或者無意識地舉起隻手行來行去。個感覺佢似係路過同觀察人類多過打緊比賽。

唔知大家作為家長會唔會有咁既感受呢?每次睇小朋友學野果陣,特別係當你對小朋友學果樣野都有咁上下認識,就好容易會教練上身,而且更容易感到煩躁。

「唉,頭先空哂仲乜唔射呀。」

「嘩!咁你都要傳?」

「搶波啦!個波喺你面前你都唔去攞既?」

弟弟一路打,我既教練心聲一路喺心內吶喊。又或者呢啲更似係鼓燥球迷既心聲吧。

打完練習賽,今日既訓練正式結束。弟弟同教練一齊叫完口號後,彈下彈下咁向我走過黎。

我:「你覺得今日打成點呀?」

弟(興奮):「我覺得我打得唔錯呀。我偷咗兩次波呀!」

其實每次比賽前,我都叫弟弟試下訂立一個目標俾自己,例如今場就係一個入波一個籃板。就結果而言,弟弟係一樣都做唔到。

我大可以呢一刻一口氣將佢要改進既地方講哂出黎。但睇到弟弟自信滿滿既樣,我覺得我呢潑冷水喺呢個時候淋落去無乜意義。因為一來佢呢一刻唔會聽得入耳,攪不好仲會淋熄咗佢團火。

我相信小朋友學任何都要有團火去維持。呢團火可以來自佢鐘意呢件事本身、來自因進步或獲勝而獲得快感又或者來自別人既讚美等等。每個人團火既來源都可能有少少不一樣。

其實大人返工都一樣需要團火呀,不過咁啱大部分人團火都係來自份糧同bonus啫。

學野無咗團火,即係返工扣糧或者無bonus。唔係唔得,不過…事倍功半啲囉。

我忍住滿肚牢騷,同弟弟講:「我好欣賞你今日既努力。今日無得換人你打足全場仲偷咗兩次波真係唔錯呀。我影低咗啲片段,不如我地今晚返去先一齊研究下點樣下場再勁啲好唔好?」

弟弟點頭。我能夠feel到佢依然自我感覺相當良好。

我諗以後每次去睇弟弟練習,我都要轉換一下心情,按捺果種想即場做教練既衝動。

「我係啦啦隊..我係啦啦隊..我係啦啦隊..」(自我催眠中)

Leave a Reply

發佈留言必須填寫的電子郵件地址不會公開。 必填欄位標示為 *